សន្តិសុខសង្គម

នគរបាលខណ្ឌទួលគោក បញ្ជូនជនដៃដល់កាត់ក្បាលប្រពន្ធទៅតុលាការ

បានផុស

២ years មុន

នៅ

ថ្ងៃចន្ទ ៣០ ឧសភា ២០២២

ដោយ

នៅព្រឹកថ្ងៃទី៣០ ខែឧសភា ឆ្នាំ២០២២ កម្លាំងនគរបាលនៃអធិការដ្ឋាននគរបាលខណ្ឌទួលគោក បានបញ្ជូនជនដៃដល់ដែលសម្លាប់ប្រពន្ធដោយកាត់ ក ទៅសាលាដំបូងរាជធានីភ្នំពេញហើយ ដើម្បីអនុវត្តតាមផ្លូវច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ថា ជនដៃដល់ត្រូវបានកម្លាំងនគរបាល នៃស្នងការនគរបាលរាជធានីភ្នំពេញ សហការជាមួយនាយកដ្ឋានព្រហ្មទណ្ឌក្រសួងមហាផ្ទៃ និងស្នងការនគរបាលខេត្តតាកែវ តាមស្រាវជ្រាវរហូតឃាត់ខ្លួនបានកាលពីវេលាម៉ោងប្រមាណ២និង៤៥នាទីរសៀល ថ្ងៃទី២៨ ខែឧសភា ឆ្នាំ២០២២ នៅតាមផ្លូវជាតិលេខ៥ ស្ថិតក្នុងខណ្ឌព្រែកព្នៅ បន្ទាប់ពីអារ ក កាត់ក្បាលប្រពន្ធសម្លាប់កាលពីវេលាម៉ោងប្រមាណ៩និង១០នាទីយប់ ថ្ងៃទី២៧ ខែឧសភា ឆ្នាំ២០២២ នៅចំណុចក្នុងបន្ទប់ជួលលេខ៧ ជាន់ទី១ ផ្ទះលេខ១៥ ផ្លូវលេខ៥៣០ ស្ថិតក្នុងភូមិ៤ សង្កាត់បឹងកក់ទី១ ខណ្ឌទួលគោក រាជធានីភ្នំពេញ។

ជនដៃដល់មានឈ្មោះ ភួង រដ្ឋា ភេទប្រុស អាយុ២៧ឆ្នាំ ស្នាក់នៅកន្លែងកើតហេតុ មានស្រុកកំណើតភូមិតាំងញាតិ ឃុំពារាម ស្រុកបាទី ខេត្តតាកែវ។ ចំណែកស្ត្រីរងគ្រោះជាប្រពន្ធមានឈ្មោះ លី ស្រីនុច អាយុ២៣ឆ្នាំ មុខរបរបុគ្គលិកផ្នែកអនាម័យ នៅ SUNWAY TOUK KORK CITY និងមានស្រុកកំណើតនៅភូមិអញ្ចាញ សង្កាត់អូរចារ ក្រុងបាត់ដំបង ខេត្តបាត់ដំបង។

ស្ត្រីរងគ្រោះ ត្រូវបានជនដៃដល់ជាប្តីកាត់ ក សម្លាប់នៅក្នុងបន្ទប់ជួល ហើយយកក្បាលច្រកចូលក្នុងបាវ រួចយកទៅបោះចោលកន្លែងចំណតម៉ូតូ ។

ហើយតាមសមត្ថកិច្ចបានអោយដឹងដែរថា ករណីខាងលើនេះ គឺផ្តើមចេញពីទំនាស់រឿងប្រចណ្ឌ ។ តាមស្ត្រីជាម្ចាស់ផ្ទះជួលបានឲ្យដឹងថា ជនរងគ្រោះបានមកជួលបន្ទប់ស្នាក់នៅជាមួយប្តីតាំងពីអំឡុងខែកុម្ភៈ ឆ្នាំ២០២២មកម្ល៉េះ។ នៅក្នុងការរស់នៅជាមួយគ្នាជាប្តីប្រពន្ធ បុរសជាប្តីតែងតែមានទំនាស់គ្នារឿងប្រចណ្ឌ។ ហើយបន្ទាប់ពីកាត់ ក សម្លាប់ប្រពន្ធរួច បុរសជាប្តីក៏បានរត់គេចខ្លួនទៅស្រុកកំណើត ហើយក៏ត្រូវបានកម្លាំងនគរបាល នៃស្នងការនគរបាលរាជធានីភ្នំពេញ និងនគរបាលខណ្ឌទួលគោក សហការជាមួយនគរបាលនាយកដ្ឋានព្រហ្មទណ្ឌក្រសួងមហាផ្ទៃ តាមរកឃាត់ខ្លួនដល់ស្រុកកំណើតនៅខេត្តតាកែវ ។ ប៉ុន្តែត្រូវបានជនដៃដល់ដឹងខ្លួនក៏គេចមកតាមផ្លូវជាតិលេខ៥ ក្នុងខណ្ឌព្រែកព្រៅ រាជធានីភ្នំពេញ តែក៏ត្រូវបានសមត្ថកិច្ចចម្រុះតាមឃាត់ខ្លួនបាន រួចបញ្ជូនមកកាន់អធិការដ្ឋានខណ្ឌទួលគោក ដើម្បីចាត់ការតាមច្បាប់៕

អត្ថបទ៖ សុខុម