(ខេត្តស្វាយរៀង)៖ បុរសម្នាក់បានស្លាប់ភ្លាមៗនៅកន្លែងកើតហេតុ ខណៈដែលបើកបរម៉ូតូលឿន ជ្រុល​ទៅបុក​ចំពីក្រោយរថយន្តកុងតឺន័រឈប់លើចិញ្ចើមផ្លូវ។ករណីគ្រោះថ្នាក់ចរាចរណ៍នេះបានកើតឡើង​កាលពីវេលាម៉ោង ១៩និង៤៥នាទីយប់ នៅថ្ងៃទី៣១ ខែឧសភា ឆ្នាំ២០២២ ស្ថិតក្នុង ភូមិត្រពាំងឆ្លូញ ឃុំញរ  ស្រុកកំពង់រោទិ៍ ខេត្តស្វាយរៀង។

យោងតាមសមត្ថកិច្ចបានឱ្យដឹងថា នៅមុនពេលកើតហេតុមានរថយន្តកុងតឺន័រ ពាក់ស្លាកលេខ ភ្នំពេញ 3B-5709 សណ្ដោងរម៉ក ស្លាកលេខ ភ្នំពេញ 4A-1176 ដោយមិនស្គាល់អត្តសញ្ញាណអ្នកបើកបរ ធ្វើដំណើរពីត្បូងទៅជើង។ លុះមកដល់ចំណុចកើតហេតុខាងលើក៏ឈប់លើចិញ្ចើមផ្លូវស្របពេលនោះ មានម៉ូតូគ្រឿងម៉ាកហុងដាឌ្រីម C125 ពណ៌ខ្មៅ ផលិតឆ្នាំ 2018 ពាក់ស្លាកលេខ ស្វាយរៀង 1K-04 25 បើកបរដោយឈ្មោះ កុយ វ៉ាន ប្រុស អាយុ35ឆ្នាំ មុខរបរកម្មករ មានទីលំនៅ ភូមិព្រៃត្រុំ ឃុំញរ ស្រុកកំពង់រោទិ៍ ខេត្តស្វាយរៀង បើកក្នុងល្បឿនលឿន ពីត្បូងទៅជើង ស្របទិសគ្នាជ្រុលទៅបុករថយន្តកុងតឺន័រពីក្រោយបណ្តាលឱ្យស្លាប់ភ្លាមៗនៅកន្លែងកើតហេតុ។

បន្ទាប់ពីបង្កហេតុរួចអ្នកបើកបរ រថយន្តកុងតឺន័រចុះរត់គេចខ្លួនបាត់ពីកន្លែងកើតហេតុបន្សល់ទុករថយន្តកុង​តឺន័រនៅ​លើចិញ្ចើមផ្លូវ។  ក្រោយមានករណីគ្រោះថ្នាក់ចរាចរណ៍ខាងលើភ្លាម គេឃើមានសមត្ថកិច្ចចុះមកសម្រួលចរាចរណ៍ វាស់វែងរថយន្ត និងម៉ូតូ យកទៅរក្សាទុកនៅប៉ុស្តិ៍នគរបាលរដ្ឋបាលឃុំញរ ដើម្បីកសាងសំណុំរឿងតាមនីតិវិធីច្បាប់ រីឯសាកសព បាន ប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕ ដោយ:ភក្ដី