អាជ្ញាធរខណ្ឌដូនពេញ ចុះបិទទីតាំងសង្ស័យបង្កប់ល្បែងស៊ីសងខុសច្បាប់

លោក សុខ ពេញវុធ អភិបាល នៃគណៈអភិបាលខណ្ឌដូនពេញ បានឲ្យដឹងនៅព្រឹកថ្ងៃទី១០ ខែមិថុនា ឆ្នាំ២០២២ នេះថា បន្ទាប់មានពីទទួលបានព័ត៌មានសម្ងាត់ថាមានការបើកលួចល្បែងស៊ីសងតាមប្រអនឡាញនោះ នៅព្រលប់ថ្ងៃទី០៩ ខែមិថុនា នេះ លោកបានចាត់ឲ្យលោក ចាប ឌីណា នាយករដ្ឋបាលខណ្ឌដូនពេញ ដឹកនាំកម្លាំងចម្រុះ ចុះត្រួតពិនិត្យទីតាំងផ្ទះ៥១Eo ៥៣Eo ផ្លូវលេខ៧០ សង្កាត់ស្រះចក ខណ្ឌដូនពេញ សង្ស័យមានបង្កប់ល្បែងស៊ីសងខុសច្បាប់ ។

ពេលក្រុមការងារចុះទៅដល់ពិនិត្យឃើញថា ទៅទីតាំងខាងលើ បានបើកអាជីវកម្មអ៉ីនធឺណិត និងមានការជួបជុំគ្នាអ៊ូអរ ក្រុមការងារក៏បានអប់រំណែនាំពួកគាត់ឲ្យត្រឡប់ទៅផ្ទះវិញ ដោយមិនអនុញ្ញាតឲ្យបន្តកាជួបជុំនៅទីតាំងខាងលើនោះទេ។

ជាលទ្ធផល ដកហូតសម្ភារៈសង្ស័យបម្រើឲ្យអាជីវកម្ម អនឡាញខុសច្បាប់មួយចំនួន យកទៅរក្សាទុកនៅសាលាខណ្ឌដូនពេញ ក្រុមការងារសម្រេចបិទទីតាំងខាងលើនេះ ដោយមិនអនុញ្ញាតឲ្យប្រកបអាជីវកម្មអ៉ីនធឺណិតទៀតឡើយ។ ក្នុង ករណីអាជ្ញាធរខណ្ឌចុះត្រួតពិនិត្យម្តងទៀត ឃើញថាមានការលបលួចប្រព្រឹត្តនោះអាជ្ញាធរខណ្ឌ និងអនុវត្តវិធានការរដ្ឋបាល ដោយធ្វើការឃាត់ខ្លួនមនុស្ស កសាងសំណុំរឿងបញ្ជូនទៅតុលាការ៕

អត្ថបទ ៖ រស្មី