កម្មករសំណង់​ដុតសំរាម​លើខុនដូ​ជាន់ទី១៣ ​ភ្ញាក់ផ្អើលដល់​ភ្នាក់ងារ​ពន្លត់អគ្គិភ័យ

កម្មករសំណង់បានដុតសំរាម​ និងខ្សែរភ្លើងនៅជាន់ទី ១៣ នៃអាគារខុនដូមួយស្ថិតនៅខណ្ឌទួល​គោក បង្កឱ្យមានការភ្ញាក់ផ្អើលដល់អាជ្ញាធរមូលរដ្ឋាន និងកម្លាំងប៉ូលិស ចុះដល់ទីតាំងកើតហេតុភ្លាមៗ ដើម្បីជួយអន្តរាគមន៍។

ហេតុការណ៍នេះបង្កឱ្យមានការភ្ញាក់ផ្អើលឡើងកាលពីវេលាម៉ោង ១៩ យប់ ថ្ងៃទី ២៤ ខែកក្កដា​ឆ្នាំ២០២២ នៅជាន់ទី១៣ នៃការដ្ឋានសាងសង់អគារមួយកន្លែង នៅផ្លូវ៥៩៦ កែង៣២៩ សង្កាត់បឹងកក់២ ខណ្ឌទួលគោក។

មន្ត្រីរដ្ឋបាលខណ្ឌទួលគោកបានឱ្យដឹងថា នៅមុនពេលកើតហេតុគេបានឃើញអណ្តាតភ្លើង​ និង​ផ្សែងហុយចេញពី ជាន់ទី ១៣ នៃការដ្ឋានសាងសង់អគារមួយកន្លែង នៅផ្លូវលេខ ៥៩៦ កែងផ្លូវ​លេខ ​៣២៩ សង្កាត់បឹងកក់២ ភ្លាមនោះទាំងអាជ្ញាធរ ដឹកនាំដោយលោក ជា ពិសី និងកម្លាំងប៉ូលិស​អគ្គីភ័យ ព្រមទាំងប៉ូលិសមូលដ្ឋានបានចុះដល់ទីតាំងកើតហេតុភ្លាមៗ ដើម្បីជួយអន្តរាគមន៍។ ក្នុងនោះរថយន្តពន្លត់អគ្គីភ័យជាច្រើនគ្រឿងក៏បានទៅជួយអន្តរាគមន៍បាញ់ពន្លត់ភ្លាមដែរ។

ប៉ុន្តែអ្វីដែលហួសចិត្តនោះ គឺមូលហេតុនៃការឆាបឆេះ ខុនដូរខាងលើនេះ ផ្តើមពីកម្មករ​សំណង់​បានយកសំរាម និងខ្សែរភ្លើងមកដុតលេង គឺមិនបានឆាប់ឆេះអ្វីនោះទេ។

ក្រោយពេលកើតហេតុ ប៉ូលីសបានហៅមេការជនជាតិចិនម្នាក់ មកប៉ុស្តិ៍រដ្ឋបាលបឹងកក់ទី២ ដើម្បី​ធ្វើកំណត់ហេតុ និងកិច្ចសន្យា មិនឱ្យមានហេតុការណ៍បែបនេះនៅថ្ងៃក្រោយទៀត៕

អត្ថបទ៖ ស្រីរ័ត្ន