លួចគាស់វីឡា​ប្រមូល​គ្រឿងសង្ហារិម​តម្លៃរាប់ម៉ឺនដុល្លារ​គេចខ្លួនបាត់ស្រមោល​

​គ្រឿងសង្ហារិមដែលសុទ្ធសឹងធ្វើឡើងពីឈើថ្លៃៗ ត្រូវបានជនមិនស្គាល់មុខលួចគ្មានសល់ ខណៈដែលម្ចាស់ផ្ទះបិទទ្វារចោលមិនបាននៅមើលអោយបានដិតដល់។

ករណីគាស់ទម្លុះទម្លាយលួចទ្រព្យសម្បត្តិនេះ គឺម្ចាស់ផ្ទះបានដឹងនៅព្រឹកថ្ងៃទី ៨ ខែសីហា ឆ្នាំ២០២២ ដែលលំនៅឋាននេះ នៅចំណុចក្រុមទី១២ ភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង។

ម្ចាស់ផ្ទះមានឈ្មោះ ថាំ ថា ភេទស្រី អាយុ៥៧ឆ្នាំ បច្ចុប្បន្នរស់នៅសហរដ្ឋអាមេរិក ដោយផ្ទះ​នេះបាន​បិទទ្វារចោល ទុកអោយក្មួយមកមើលម្តងម្កាល់ ដោយមិនបានរស់នៅក្នុងផ្ទះនេះ​ឱ្យបានដិត​ដល់​ឡើយ។

លុះនៅព្រឹកម្សិលមិញនេះ ពេលដែលក្មួយទៅមើលទើបដឹងថា​ទ្វារផ្ទះត្រូវបាន​ជនមិនស្គាល់​មុខគាស់របើកខ្ទេចខ្ទី ឯសម្ភារៈមានតម្លៃក្នុងផ្ទះក៏ត្រូវបានលួចគ្មានសល់ដែរ ទើបក្មួយបានទៅដាក់​ពាក្យបណ្តឹងនៅអធិការដ្ឋាននគរបាលក្រុងបាត់ដំបង ដើម្បីជួយអន្តរាគមន៍ និងស្រាវជ្រាវ។

សម្ភារបាត់បង់រួមមាន គ្រែម៉ុងចំនួន ២ ទ្វារសន្លឹក ២ចំហៀង សន្លឹកគ្រែដឺវ៉ង់២សន្លឹក ម៉ាស៊ីន​ទឹកក្តៅ​ចំនួន៣ ម៉ាស៊ីនត្រជាក់១គ្រឿង ទូរទស្សន៍១គ្រឿង និងក្រណាត់ខោអាវល្អមួយចំនួន ដែលសរុបជា​ទឹកប្រាក់ប្រមាណ១៥.០០០ ដុល្លារ។ បច្ចុប្បន្នសមត្ថកិច្ចកំពុងធ្វើការស្រាវជ្រាវហើយដើម្បីតាម​រកមុខសញ្ញាយកមកផ្តន្ទាទោសតាមផ្លូវច្បាប់៕

អត្ថបទ៖ សោ និយមរ័ត្ន