អាជ្ញាធរក្រុងក្រចេះ ចុះឆែកឆេរហាងបញ្ចាំមួយកន្លែងដកហូតម៉ូតូគ្មានឯកសារ៣៣គ្រឿង

កម្លាំងគណៈបញ្ជាការឯកភាពក្រុងក្រចេះ​ ដឹកនាំសម្របសម្រួលនីតិវិធីដោយលោក រ៉ា បូរ៉ាន់ឌី ព្រះរាជអាជ្ញារងអមសាលាដំបូងខេត្តក្រចេះ បានចុះឆែកឆេរលំនៅដ្ឋាន១កន្លែង ស្ថិតនៅភូមិស្រែស្តៅ សង្កាត់អូរឬស្សី ក្រុងក្រចេះ ខេត្តក្រចេះ ពាក់ព័ន្ធការទទួលបញ្ចាំដោយខុសច្បាប់ (គ្មានលិខិតអនុញ្ញាត) និងឆែកឆេររកឃើញម៉ូតូគ្មានឯកសារចំនួន៣៣គ្រឿង។

ប្រតិបត្តិការចុះបង្ក្រាបនេះ បានធ្វើឡើងកាលពីថ្ងៃទី៩ ខែសីហា ឆ្នាំ២០២២ ស្ថិតនៅភូមិស្រែស្តៅ សង្កាត់អូរឬស្សី ក្រុងក្រចេះ ខេត្តក្រចេះ ហើយវត្ថុតាងម៉ូតូទាំង៣៣គ្រឿង កម្លាំងសមត្ថកិច្ចបានដកហូតយកមករក្សាទុកជាបណ្តោះអាសន្ននៅអធិការដ្ឋាននគរបាលក្រុងក្រចេះ ។

ជាមួយគ្នានេះ សមត្ថកិច្ចក៏បានអំពាវនាវដល់បងប្អូនព្រជាពលរដ្ឋដែលធ្លាប់បាត់ម៉ូតូ សូមពិនិត្យមើលភិនភាគម៉ូតូដែរមានក្នុងឯកសារ និងទំនាក់ទំនងមកអធិការដ្ឋាននគរបាលក្រុងក្រចេះ ហើយភ្ជាប់មកជាមួយនូវឯកសារពាក់ព័ន្ធមកជាមួយផង៕

អត្ថបទ៖ សុខុម