ដកបញ្ឈរជើងមន្ត្រីនគរបាលចរាចរណ៍ម្នាក់ ករណីប្រើពាក្យសម្ដី និងកាយវិការមិនសមរម្យលើពលរដ្ឋ(មានវីដេអូ)

បន្ទាប់ពីបែកធ្លាយរូបភាពវីដេអូដែលចែកចាយនៅលើបណ្ដាញសង្គមនូវពាក្យសម្ដី និងកាយវិការមិនសមរម្យរបស់មន្ត្រីនគរបាលចរាចរណ៍ម្នាក់ក្នុងពេលអនុវត្តច្បាប់ចរាចរណ៍រួចមក នៅថ្ងៃទី១៥ ខែតុលា ឆ្នាំ២០២២នេះ ស្នងការដ្ឋាននគរបាលរាជធានីភ្នំពេញ បានកោះហៅឲ្យមន្ត្រីរូបនោះចូលខ្លួនដើម្បីសួរនាំ និងអនុវត្តវិន័យកងកម្លាំងដោយធ្វើការណែនាំអប់រំ ធ្វើកិច្ចសន្យា និងដកមកបញ្ឈរជើងរយៈពេល០៣ខែ។

ស្នងការនគរបាលរាជធានីភ្នំពេញ បានបញ្ជាក់ថា បន្ទាប់ពីបានឃើញឃ្លឹបវីដេអូផ្សព្វផ្សាយនៅលើបណ្តាញសង្គមទាក់ទងទៅនឹងមន្ត្រីនគរបាលចរាចរណ៍មួយរូបឈ្មោះ ពុត ធារី បានប្រើប្រាស់ពាក្យពេចន៍ និងកាយវិការ​មិនសមរម្យទៅលើប្រជាពលរដ្ឋដែលបើកបរល្មើសច្បាប់ចរាចរណ៍នៅគោលដៅផ្លូវជាតិលេខ៥ ការិយាល័យបុគ្គលិក នៃផែនការងារធនធានមនុស្ស បានធ្វើការកោះហៅឲ្យមន្ត្រីរូបនោះចូលខ្លួនដើម្បីសួរនាំ និងអនុវត្តវិន័យ​កងកម្លាំង ដោយធ្វើការណែនាំអប់រំ ធ្វើកិច្ចសន្យា និងដកមកបញ្ឈរជើងរយៈពេល០៣ខែ ហើយត្រូវបង្ហាញមុខនៅការិយាល័យបុគ្គលិកជារៀលរាល់ថ្ងៃម៉ោងធ្វើការ៕