នគរបាលចរាចរណ៍រាជធានី នឹងចុះអនុវត្តច្បាប់ ផាកពិន័យឡើងវិញ ក្រោយអត្រាគ្រោះថ្នាក់មានកម្រិតខ្ពស់

កម្លាំងនគរបាលចរាចរណ៍ នៃស្នងការការដ្ឋាននគរបាលរាជធានីភ្នំពេញ នឹងចាប់ផ្ដើមអនុវត្តច្បាប់ចរាចរណ៍ផាកពីន័យឡើងវិញ ក្រោយសង្កេតឃើញអត្រាគ្រោះថ្នាក់កើតមានក្នុងកម្រិតខ្ពស់។

ការប្រកាសអនុវត្តច្បាប់ចរាចរណ៍ផាកពីន័យនេះ ធ្វើឡើងនោក្នុងកិច្ចប្រជុំបូកសរុបលទ្ធផលការងារកម្លាំងនគរបាលចរាចរណ៍ និងដាក់ទិសដៅការងារបន្ត ដែលដឹកនាំដោយលោកឧត្តមសេនីយ៍ទោ ហេង រតនា ស្នងការរងផែនការងារនគរបាលចរាចរណ៍ នៅព្រឹកថ្ងៃទី១៥ ខែកុម្ភៈ ឆ្នាំ២០២៦។ ការអនុវត្តការរឹតបន្តឹងច្បាប់ចរាចរណ៍នេះ ធ្វើឡើងក្រោយអត្រាគ្រោះថ្នាក់កំពុងបន្តគំរាមកំហែងដល់សុខសុវត្ថិភាពលើដងផ្លូវសាធារណៈ និងអាយុជីវិតរបស់ពលរដ្ឋអ្នកដំណើរ ។

ការចុះរឹតបន្តឹងច្បាប់តាមរយៈការផាកពិន័យឡើងវិញនេះ ក៏ធ្វើឡើងបន្ទាប់ពីមានគោលការណ៍អនុញ្ញាតពីក្រសួងមហាផ្ទៃ និងអគ្គស្នងការដ្ឋាននគរបាលជាតិ ក្រោយពិនិត្យឃើញថា អត្រាគ្រោះថ្នាក់មិនបានថមថយនោះឡើយ បន្ទាប់ពីកម្លាំងសមត្ថកិច្ចបានប្រើប្រាស់វិធានការណ៍រឹតបន្តឹងច្បាប់តាមរយៈការចុះផ្សព្វផ្សាយអប់រំណែនាំអស់រយៈពេលជាងកន្លះឆ្នាំកន្លងមក ពោលគិតចាប់តាំងពីខែកក្កដា ឆ្នាំ២០២៥៕

អត្ថបទ៖ សុភា