អនុប្រធានមន្ទីរពាណិជ្ជកម្មខេត្តបាត់ដំបង រងរបួសបែកក្បាល​បញ្ជូនទៅពេទ្យ

ករណីប្រើហិង្សាទៅលើជនរងគ្រោះដែលមានតួនាទីជាអនុប្រធានមន្ទីរពាណិជ្ជកម្មខេត្តម្នាក់បណ្តាលឲ្យបែកក្បាល ក្រោយ​បុរស​ជា​ជនដៃដល់បាន​យកដុំឥដ្ឋគប់ក្បាលជនរងគ្រោះ បណ្តាលឲ្យបែកហូរឈាមជោគខ្លួន។

ករណីនេះកម្លាំងអាវុធហត្ថខេត្តបានឃាត់ខ្លួនជនដៃដល់កាលពីវេលាម៉ោង១១ថ្ងៃត្រង់ថ្ងៃទី២០ វិច្ឆិកា នៅចំណុចភូមិចំការសំរោង១ សង្កាត់ចំការសំរោង ក្រុងបាត់ដំបង ។

បើតាមមន្ត្រីកងរាជអាវុធហត្ថខេត្ត អំពើហិង្សានេះផ្ដើមចេញពីជម្លោះរ៉ៃរាំចងជាគំនុំ រវាងភាគីជនរងគ្រោះនិងជនដៃដល់ដែលរស់នៅក្បែរខាងគ្នាជាយូរមកហើយ។

ជនសង្ស័យមានឈ្មោះ ទឹម វណ្ណរឹទ្ធ ហៅទូច ភេទប្រុស អាយុ៤១ឆ្នាំ ជាបុគ្គលិកធនាគារមួយ។ រីឯជនរងគ្រោះឈ្មោះ ពែត ថារ៉ូ ហៅជីត ភេទប្រុស អាយុ៥២ឆ្នាំ មានតួនាទីជាអនុប្រធានមន្ទីរពាណិជ្ជកម្មខេត្តបាត់ដំបង។

ប្រភពដដែលបន្តថា ក្រោយពីជនសង្ស័យបានយកដុំឥដ្ឋគប់ក្បាលអនុប្រធានមន្ទីរពាណិជ្ជកម្មខេត្តបណ្ដាលឲ្យបែកឈាម កាលពីយប់ថ្ងៃទី ១៩ វិច្ឆិកា នៅចំណុចកើតហេតុ ជនដៃដល់បានគេចខ្លួនបាត់មួយយប់ លុះព្រឹកឡើងនៅថ្ងៃទី ២០ ខែ វិច្ឆកា ត្រូវកម្លាំងកងរាជអាវុធហត្ថឃាត់ខ្លួនបានតែម្តង ។

បើទោះយ៉ាងណា ពេលនេះជនដៃដល់ត្រូវបានកម្លាំងកងរាជអាវុធហត្ថក្រុងឃាត់ខ្លួនតាមបទបញ្ជាលោកមេបញ្ជាការកងរាជអាវុធហត្ថខេត្ត និង តំណាងអយ្យការអមសាលាដំបូងខេត្ត ដើម្បីចាត់ការតាមនីតិវិធ៕

អត្ថបទ៖ សៅ សារិទ្ធ