មកដឹងលម្អិត ពាក់ព័ន្ធការស្លាប់របស់ ទារករងគ្រោះថ្នាក់ចរាចរណ៍លើស្ពានជ្រោយចង្វា

តស៊ូបាន ៤យប់ ទីបំផុត ទារកដែលរងគ្រោះថ្នាក់ចរាចរណ៍លើស្ពានជ្រោយចង្វា បានលាចាកលោក នៅយប់ថ្ងៃទី៨ ខែធ្នូ ឆ្នាំ២០២២នេះហើយ។ នេះបើតាមការបង្ហោះរបស់ លោក ផន ផល្លា ដែលធ្លាប់ និងកំពុងបន្តជួយគ្រួសារទារក។

លោកសាស្ត្រាចារ្យ គី សង់ទី ប្រធានមន្ទីរពេទ្យគន្ធបុប្ផា បានមានប្រសាសន៍ប្រាប់ “កម្ពុជាថ្មី” ថា ក្រុមគ្រូពេទ្យបានខំជួយអស់ពីសមត្ថភាព ព្រមទាំងបានយកទៅបន្ទប់សង្គ្រោះបន្ទាន់កម្រិតខ្ពស់ ខំជួយ សង្គ្រោះ​ដោយម៉ាស៊ីនសប់ដង្ហើមរហូត ប៉ុន្តែទារកមានស្ថានភាពធ្ងន់ធ្ងរ ដោយក្រឡកខួរក្បាល ឈាមក្នុងខួរក្បាល ហើមខួរក្បាលធ្ងន់ធ្ងរបំផុត ហើយបែកថង់សួត ហើមសួតប៉ះទង្គិចខ្លាំង។

លោកប្រធានមន្ទីរពេទ្យគន្ធបុប្ផា បានឱ្យដឹងបន្ថែមថា នៅមន្ទីរពេទ្យគន្ធបុប្ផា រាល់ការព្យាបាលទាំងអស់ គឺឥតគិតថ្លៃ សម្រាប់គ្រប់ៗគ្នា ដោយគ្មានការរើសអើង។ ជាមួយគ្នានេះ លោកសូមសំណូមពរប្រជាពលរដ្ឋទាំងអស់បើកបរដោយគោរពច្បាប់ចរាចរណ៍ គោរពយោគយល់គ្នា ខណៈមានកុមាររងគ្រោះថ្នាក់ចរាចរណ៍មានរាល់ថ្ងៃ និងធ្ងន់ធ្ងរភាគច្រើន។

​​គួរបញ្ជាក់ថា កាលពីម៉ោង ២អធ្រាត្រ ថ្ងៃទី៥ ខែធ្នូ ឆ្នាំ២០២២  រថយន្តមួយគ្រឿងម៉ាក LEXUS NX200t បើកបរដោយបុរសម្នាក់ ក្នុងល្បឿនលឿនឆ្លងកាត់ស្ពានជ្រោយចង្វា ក្នុងទិសដៅពីលិចទៅកើត បុកម៉ូតូ ពេញទំហឹង បណ្តាលឱ្យទារក និងមនុស្សចាស់២នាក់ ខ្ទាត គ្រោះថ្នាក់ធ្ងន់ និងត្រូវជួយសង្គ្រោះបន្ទាន់។

ជនបង្កត្រូវសមត្ថកិច្ចឃាត់ បញ្ជូនទៅប៉ុស្តិ៍ភ្លាមៗ។ ជនបង្ក បានបង់សំណង ២ ៥០០ ដុល្លារអាមេរិក។ ករណីនេះ ធ្វើ​ឱ្យ​មហាជន​រិះគន់​​ រហូតមានការប្ដឹងដល់ ក្រុម​មេធាវី​ស្ម័គ្រចិត្ត​សម្ដេច ហ៊ុន សែន ដើម្បីរកយុត្តិធម៌ពិតប្រាកដ​។

នៅថ្ងៃទី៦ ខែធ្នូ ឆ្នាំ២០២២នេះ ក្រុម​មេធាវី​ស្ម័គ្រចិត្ត​សម្ដេចតេជោ សែន ចំនួន ៤នាក់ បានចុះទៅជួបផ្ទាល់ក្រុមគ្រួសារជនរងគ្រោះ និងម្ដាយទារក ដើម្បី​ការពារ​តាមផ្លូវ​ច្បាប់​៕