ស្ពានជ្រោយចង្វារ! ក្នុងពេលតែមួយមានមនុស្សពីរនាក់ផ្សេងគ្នាលោតទឹកសម្លាប់ខ្លួន ខណៈម្នាក់ត្រូវបានជួយទាន់ពេល

នៅក្នុងពេលតែមួយមានមនុស្សប្រុសស្រីពីរនាក់ផ្សេងគ្នាបានមកលោតទឹកសម្លាប់ខ្លួនលើស្ពានជ្រោយចង្វារ តែក្នុងចំណោមជនរងគ្រោះទាំងពីរនាក់នេះ មានម្នាក់ត្រូវបានប្រជានេសាទក៏ដូចជាពលរដ្ឋជួយសង្គ្រោះទាន់ពេលវេលា ខណៈម្នាក់ទៀតលិចចូលក្នុងទឹកបាត់។ បើតាមការឲ្យដឹងពីប្រជាពលរដ្ឋដែលនៅជិតស្ពានជ្រោយចង្វារ នារីរងគ្រោះដែលលោតចូលទឹកកំពុងបាត់ខ្លួននោះ បានព្យាយាមមកសម្លាប់ខ្លួនលើស្ពានជ្រោយចង្វារ០២ថ្ងៃជាប់គ្នា ចំនួន៣លើកមកហើយ។

ហេតុការណ៍នេះបង្កភ្ញាក់ផ្អើលកាលពីវេលាម៉ោង ០៩យប់ថ្ងៃទី១៧ ខែឧសភា ឆ្នាំ២០២៦ នៅក្រោមស្ពានជ្រោយចង្វារ ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។

តាមប្រភព័ត៍មានពីស្រ្តីជាអ្នកសង្គ្រោះបានឲ្យដឹងថា មុនកើតហេតុគាត់បានអង្គុយនិយាយគ្នាលេងនៅក្រោមស្ពានជ្រោយចង្វារ ខណៈនោះក៏មានបុរសម្នាក់ ឡើងឈរលើបង្កាន់ដៃស្ពានហើយបានលោតចុះមកក្រោមតែម្តង។ ភ្លាមៗ គាត់បានរត់ចុះទៅជួយសង្រ្គោះបុរសនោះ និងបានយកឡើងមកលើគោកទាក់ទងរករថយន្តពេទ្យដើម្បីជួយសង្គ្រោះ។

ប្រភពដដែលបានបន្តថា ស្របពេលនោះ ក៏លេចវត្តមានយុវតីដែលប៉ុនប៉ងសម្លាប់ខ្លួន ០៣ដង ចំនួន០២ថ្ងៃជាប់ៗគ្នា មកប្រាប់គាត់ថា មានគេវាយគាត់យកទូរស័ព្ទបាត់ហើយ។ ដោយពេលនោះស្រ្តីជាអ្នកសង្រ្គោះមិនបានចាប់អារម្មណ៍ក៏យុវតីរូបនោះរត់ទៅទម្លាក់ខ្លួនពីមាត់ច្រាំងចូលទឹកទន្លេលិចបាត់ស្រមោលតែម្តង។

បន្ទាប់ពីកើតហេតុ ក្រុមគ្រូពេទ្យដឹកជនរងគ្រោះដែលសង្គ្រោះបានពីក្នុងទឹក យកទៅសង្គ្រោះនៅមន្ទីរពេទ្យ ចំណែកយុវតីដែលលិចបាត់ខ្លួន គឺនៅមិនទាន់រកឃើញនៅឡើយ៕

អត្ថបទ៖ រដ្ឋា