ផ្ទុះហ្គាសឆេះផ្ទះក្នុងបុរីមួយកន្លែងផ្អេីលសមត្ថកិច្ចចុះអន្តរាគមន៍

អគ្គិភ័យបានឆាបឆេះផ្ទះប្រជាពលរដ្ឋមួយកន្លែងបណ្តាលឱ្យរងការខូចខាតសម្ភារៈមួយចំនួនធំបង្កការភ្ញាក់ផ្អេីលកាលពីវេលាម៉ោង១៥និង០០នាទី រសៀលថ្ងៃទី០៤ ខែមករា ឆ្នាំ២០២៣ នៅចំណុចបុរីម៉នរ៉ានី ផ្ទះលេខB 1 ផ្លូវលេខ០៥ ភូមិស្វាយ សង្កាត់ស្នោ ខណ្ឌកំបូល រាជធានីភ្នំពេញ។

តាមប្រភពព័ត៌មានបានឱ្យដឹងថា មុនពេលកេីតហេតុម្ចាស់ផ្ទះបានដាក់ដាំទឹកនៅចង្ក្រានផ្នែកខាងក្រោយ ហេីយមកអង្គុយលេងនៅខាងក្នុងផ្ទះ បន្ទាប់មកស្រាប់តែឮសំលេងផ្ទុះហ្គាសបង្កជាអណ្តាតភ្លេីងយ៉ាងសន្ធោសន្ធៅទេីបផ្អេីលឆោឡោដល់ប្រជាពលរដ្ឋដែលរស់នៅក្បែររាយការណ៍ទៅសមត្ថកិច្ចហៅរថយន្តពន្លត់អគ្គិភ័យជាច្រេីនគ្រឿងមកអន្តរាគមន៍ភ្លាមៗ។

ក្នុងវង្វង់ប្រតិបត្តិការក្នុងគ្រោះអគ្គិភ័យខាងលេីនេះ កម្លាំងសមត្ថកិច្ចបានប្រេីប្រាស់រថយន្តពន្លត់អគ្គិភ័យចំនួន៦គ្រឿង របស់បុរីម៉នរ៉ានី ចំនួន៣គ្រឿង រថយន្ដសង្គ្រោះរបស់ សង្ឃឹមថ្មី ២គ្រឿង និងរថយន្តពន្លត់អគ្គិភ័យរបស់ស្នងការនគរបាលរាជធានីចំនួន១គ្រឿង ហេីយអគ្គិភ័យក៏រលត់ទៅវិញ ដោយមិនមានមនុស្សរងរបួសនោះទេ ចំណែកសម្ភារៈដែលខូចខាតនៅខាងក្នុងចង្ក្រានបាយផ្នែកខាងក្រោយខូចខាតទាំងស្រុង៕

អត្ថបទ៖ សុខា