លោកយាយព្រះជន្ម៨០ឆ្នាំម្នាក់ បានរងរបួសបាក់កដៃដោយសារកូនប្រុសប្រើហឹង្សា ខណៈចូលទៅឃាត់កូននិងចៅកំពុងប្រតាយប្រតប់គ្នារឿងខ្ចីម៉ូតូជិះ។

បុរសប្រើហឹង្សារលើម្តាយបង្កើតជរាបណ្តាលឲ្យបាក់កដៃ ត្រូវបានកម្លាំងនគរបាលស្រុកឧដុង្គធ្វើការឃាត់ខ្លួន នៅល្ងាចថ្ងៃ​ទី១០នខែមករា ឆ្នាំ២០២៣ ក្នុងដីឡូតិ៍របស់ឈ្មោះសឿន ថន ភេទស្រី អាយុ៤៨ឆ្នាំ ស្ថិតនៅភូមិត្រពាំងខ្ចៅ ឃុំត្រាចទង ស្រុកឧដុង្គ ខេត្តកំពង់ស្ពឺ។

នគរបាលស្រុកឧដុង្គ បានឲ្យដឹងថា ជនបង្កហឹង្សាលើម្តាយចាស់និងកូនមានឈ្មោះ សឿន សុធារ៉ា ភេទប្រុស អាយុ​៤៣​ឆ្នាំ រស់នៅភូមិ-ឃុំកើតហេតុខាងលើ។ ចំណែកលោកយាយរងគ្រោះជាម្ដាយបង្កើតឈ្មោះ ចែម យ៉ន អាយុ៨០ឆ្នាំ រស់នៅជាមួយគ្នា។

នគរបាលបន្ថែមថា មុនពេលកើតហេតុ ជនដៃដល់បានវាយប្រតាយប្រតាប់ជាមួយកូនប្រុសបង្កើតឈ្មោះ សឿន គីនីន អាយុ ២១ឆ្នាំដោយបញ្ហាខ្ចីម៉ូតូជិះ។ ដោយមើលឃើញសកម្មភាពកូនបង្កើតនិងចៅប្រតាយប្រតប់គ្នាបែបនេះ លោក​យាយ​ចែម យ៉ន បានចូលទៅទាញកអាវ និងឃាត់កូនមិនឲ្យវ៉ៃចៅ តែកូនមិនស្ដាប់ហើយក៏ចាប់ដៃម្ដាយសង្កត់ពីលើបណ្ដាលអោយបាក់កដៃម្ដាយខាងឆ្វេងតែម្តង។

បច្ចុប្បន្នជនសង្ស័យត្រូវបានឃាត់ខ្លួនបញ្ជូនមកអធិការដ្ឋាននគរបាលស្រុកឧដុង្គដើម្បីសាកសួរ និងចាត់ការតាមនិតិវិធីច្បាប់៕

អត្ថបទ៖ ភួង រដ្ឋា