កម្លាំងមន្ទីរប្រឆាំងគ្រឿងញៀនផ្ទុះអាវុធ​៣គ្រាប់ រងរបួសមនុស្សម្នាក់ រួចនាំគ្នាគេចខ្លួនបាត់​អស់

បុរសម្នាក់បានរងរបួសធ្ងន់ ត្រូវបានកម្លាំងសមត្ថកិច្ចមូលដ្ឋាន និងប្រជាពលរដ្ឋដឹកយកទៅសង្គ្រោះនៅមន្ទីរពេទ្យ បន្ទាប់ពីត្រូវកម្លាំងនគរបាលនៃមន្ទីរប្រឆាំងបទល្មើសគ្រឿងញៀន បាញ់ចំនួន៣គ្រាប់ ខណៈពេលចុះប្រតិបត្តិការបង្ក្រាបគ្រឿង តែក្រោយពីផ្ទុះអាវុធបណ្ដាលឲ្យមានអ្នករងរបួសហើយនោះ ក៏នាំគ្នាគេចខ្លួនចេញពីកន្លែងកើតហេតុបាត់អស់។

ហេតុការណ៍ផ្ទុះអាវុធបណ្ដាលឲ្យមានអ្នករងរបួសនេះ បានកើតឡើងកាលពីវេលាម៉ោង៧និង៥៥នាទីយប់ ថ្ងៃទី១ ខែមីនា ឆ្នាំ២០២៣ នៅចំណុចផ្លូវបេតុង ក្នុងភូមិដំណាក់សង្កែ សង្កាត់ព្រែកកំពឹស ខណ្ឌដង្កោ រាជធានីភ្នំពេញ។

លោកវរសេនីយ៍ឯក ជឹម ស៊ីថា អធិការ នៃអធិការដ្ឋាននគរបាលខណ្ឌដង្កោ បានឲ្យដឹងនៅព្រឹកថ្ងៃទី២ ខែមីនា នេះថា ករណីនេះគឺកម្លាំងនគរបាលនៃមន្ទីរប្រឆាំងបទល្មើសគ្រឿងបានចុះប្រតិបត្តិការបង្ក្រាបមុខសញ្ញាគ្រឿងញៀន តែដោយ​ជនសង្ស័យដកកាំបិតខ្វាវបំរ៉ុងតដៃ ក៏កម្លាំងបាញ់ចំនួន៣គ្រាប់រងរបួសតែម្ដង។

លោកអធិការបន្ថែមថា ក្រោយពីកើតហេតុ ដោយឃើញជនសង្ស័យរងរបួសបែបនេះ​ កម្លាំងនគរបាលនៃមន្ទីរប្រឆាំងគ្រឿងញៀនបាននាំគ្នាគេចខ្លួនចេញពីកន្លែងកើតហេតុបាត់អស់ ដោយឡែកជនរងគ្រោះក្នុងអំពើបាញ់ប្រហារនេះ​ ត្រូវបានកម្លាំងសមត្ថកិច្ចមូលដ្ឋាន និងសាច់ញាតិដឹកយកទៅសង្គ្រោះនៅមន្ទីរពេទ្យ។

បើតាមលោកអធិការបញ្ជាក់ថា នៅកន្លែងកើតហេតុកម្លាំងរបស់លោកមិនបានរកឃើញជាក់ស្ដែងនូវប្រភេទថ្នាំញៀនអ្វីនោះទេ ចំណែកការពិនិត្យទឹកនោមរកសារធាតញៀនក៏មិនបានពិនិត្យដែរ ដោយសារជនសង្ស័យនោមមិនចេញ៕

អត្ថបទ៖ សុខុម