ជនសង្ស័យម្នាក់ពាក់ព័ន្ធករណីគ្រឿងញៀនត្រូវបានកម្លាំងការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តរតនគីរីធ្វើការឃាត់ខ្លួន។

កាលពីយប់ថ្ងៃទី៩ ខែមីនា ឆ្នាំ២០២៣​ សមត្ថកិច្ចជំនាញនៃការិយាល័យប្រឆាំងគ្រឿងញៀន ដឹកនាំដោយលោក វរសេនីយ៍ឯក សុខ សែនចំរ៉ុង​ នាយការិយាល័យប្រឆាំងគ្រឿងញៀនបានចុះបង្រា្កបករណីរក្សាទុក និងដឹកជញ្ជូនដោយខុសច្បាប់សារធាតុញៀន១ករណី បានឃាត់ខ្លួនជនសង្ស័យម្នាក់ និងបានដកហូតសារធាតុញៀនមួយចំនួន។

លោក សុខ សែនចំរ៉ុង នាយការិយាល័យប្រឆាំងគ្រឿងញៀនបានឲ្យកម្ពុជាថ្មីដឹងនៅរសៀលថ្ងៃទី១២មីនានេះ ថា នៅយប់ថ្ងៃទី៩ ខែមីនា ឆ្នាំ២០២៣ វេលាម៉ោងប្រហែល ២៣និង០០នាទី សមត្ថកិច្ចជំនាញ នៃការិយាល័យប្រឆាំងគ្រឿងញៀនបានចុះអនុវត្តវិធានរដ្ឋបាលនៅទីតាំងបន្ទប់ជួលគ្មានលេខមួយកន្លែង ស្ថិតក្នុងភូមិអូរកន្ទិល សង្កាត់​បឹង​កន្សែង ក្រុងបានលុង បានឆែកឆេររកឃើញសារធាតុញៀនចំនួន ៥ កញ្ចប់ ដែលជនសង្ស័យបានលាក់ទុកនៅក្នុងអាវរបស់ខ្លួន។

ក្រោយពីបានឆែកឆេររួច សមត្ថកិច្ចបានធ្វើការសាកសួរជនសង្ស័យពីប្រភពនៃសារធាតុញៀន។ ផ្អែកតាមចំលើយរបស់​ជនសង្ស័យបានសារភាពថា ថ្នាំញៀនទាំងនេះគឺមានបុរសម្នាក់ដែលខ្លួនហៅថាមេ មានរូបរាងស្គមខ្ពស់ សក់រួញ សាក់ពេញដៃជើងនិងខ្លួន ជិះឡានម៉ាកតាកូម៉ា ពណ៌ស្ករ គ្មានស្លាលេខ ទុកឲ្យសម្រាប់ចែកចាយលក់ក្នុងក្រុងបានលុង។

តាមចំលើយរបស់ជនសង្ស័យបានសារភាពបន្ថែមទៀតថា ក្នុងយប់នេះមេរបស់ខ្លួននឹង​ដឹកថ្នាំញៀនមួយចំនួនធំពីស្រុកមកក្រុងបានលុង រួចចូលមកយកខ្លួនដើម្បីយកថ្នាំញៀនទាំងនោះយកទៅឲ្យមនុស្សម្នាក់តែមេរបស់ខ្លួនមិនបានប្រាប់ថាជារបស់អ្នកណាឡើយ។

លោក សុខ សែនចំរ៉ុង នាយការិយាល័យបានបញ្ជាក់ថា នៅពេលដែលសមត្ថកិច្ចកំពុងសាកសួរជនសង្ស័យ ស្រាប់តែរថយន្តតាកូម៉ា ដែលមានភិនភាគខាងលើ បើកបរដោយបុរសម្នាក់ដែលមានរូបរាងភិនភាគដូចជន​សង្ស័យ​ប្រាប់ ចូលមកដល់ ស្រាប់តែឃើញសមត្ថកិច្ចក៏បានបើករថយន្តរត់គេចខ្លួនចេញទៅបាត់។

សមត្ថកិច្ចក៏បានប្រដេញមកដល់ចំណុចផ្លូវបំបែកជាបួនព្រំប្រទល់រវាងភូមិជ័យជំនះ និងភូមិថ្មី សង្កាត់ឡាបានសៀក ក្រុងបានលុង ក៏បានទាន់និងឃាំងឃាត់រថយន្តរបស់ជនសង្ស័យនោះតែម្ដង ដើម្បីធ្វើការសាកសួរនិងឆែកឆេរ។ នៅពេលនោះ​ជនសង្ស័យបានប្រើប្រាស់អាវុធមិនដឹងម៉ាកបាញ់ចេញពីរថយន្តសំដៅមកលើសមត្ថកិច្ចចំនួន ១ គ្រាប់ដើម្បីរំដោះខ្លួនគេចចេញពីការហំព័ទ្ធរបស់សមត្ថកិច្ច បណ្ដាលឲ្យផ្លាតត្រូវចំជញ្ជាំងផ្ទះរបស់ប្រជាពលរដ្ឋដែលរកនៅម្ដុំនោះចំនួន១ខ្នង។

ក្រោយពីសមត្ថកិច្ចឃើញជនសង្ស័យមានអាវុធបាញ់មកលើសមត្ថកិច្ច ដើម្បីជៀសផុតពីគ្រោះថ្នាក់ និងដើម្បីកុំឲ្យជនសង្ស័យបើករថយន្តរត់គេចខ្លួនបាន សមត្ថកិច្ចក៏​សម្រេចចិត្តបាញ់តបតសំដៅទៅលើកង់រថយន្តរបស់ជនសង្ស័យ ដើម្បីបង្អាក់ដំណើរបណ្ដាលឲ្យបែកធ្លាយកង់រថយន្ត ក៏ប៉ុន្តែជនសង្ស័យនៅតែព្យាយាមបើករថយន្តគេចខ្លួនជាបន្តបន្ទាប់ទៀត។

ក្រោយពីជនសង្ស័យបើករថយន្តបន្តរត់គេចខ្លួន សមត្ថកិច្ចក៏បន្តតាមឃាត់ចាប់រហូតដល់ផ្លូវលំដីគ្រោះក្រហមត្រង់ចំណុចចម្ការស្វាយចន្ទីមួយកន្លែង ក៏ឃើញជនសង្ស័យទុករថយន្តចោលរួចរត់គេចខ្លួនចូលក្នុងព្រៃបាតជ្រោះបាត់ទៅ។

ដោយស្ថានភាពមេឃងងឹត ព្រៃក្រាស់ ទើបធ្វើឲ្យសមត្ថកិច្ចមិនអាចស្វែងរកជនសង្ស័យជាមេខ្លោងដើម្បីធ្វើការចាប់ឃាត់ខ្លួនបានឡើយ។ ក្រោយពីធ្វើការរុករកមួយរយៈពេលធំ សមត្ថកិច្ចក៏បានដកកម្លាំងហើយនាំយករថយន្តរបស់​ជនស្ស័យមកកាន់ស្នងការដ្ឋាននគរបាលខេត្ត ដើម្បីឆែកឆេរ និងអនុវត្តតាមនិតិវិធីបន្ត។

ជនសង្ស័យ ១-ឈ្មោះ​ ផេង ស៉ីផៃ ភេទប្រុស អាយុ២៤ឆ្នាំ ជនជាតិខ្មែរ មុខរបរ មិនពិតប្រាកដ។ ជនសង្ស័យនេះ បានធ្វើតេស្តទឹកនោម រកសារធាតុញៀនលទ្ធផលវិជ្ជមាន(+)។

ក្រោយឃាត់ខ្លួនជនសង្ស័យ សមត្ថកិច្ចបានដកហូតវត្ថុរួមមាន​៖

១-ក្រាមម្សៅសថ្លាជាសារធាតុញៀនចំនួន០៥កញ្ចប់ ទម្ងន់សុទ្ធ០.៧០ក្រាម
២-រថយន្ត០១គ្រឿង
៣-ថង់ច្រកថ្នាំញៀនមួយចំនួន។

បច្ចុប្បន្ន​ជន​សង្ស័យ​រួម​ទាំង​វត្ថុតាងត្រូវ​បានឃាត់និង​រក្សារទុក​នៅ​ការិយាល័យ​ប្រឆាំង​គ្រឿងញៀន​ ដេីម្បី​កសាង​សំណុំរឿង​បញ្ជូន​ទៅ​អយ្យការ​អម​សាលា​ដំបូង​ខេត្ត​ ចាត់​ការ​តាម​និតីវិធី​ច្បាប់​៕

អត្ថបទ៖ វុទ្ធឦសាន