ក្មេងស្រី​សិស្ស​បឋម ៥ នាក់ លង់ទឹកស្លាប់ព្រមគ្នានៅស្រះក្រោយ​សាលារៀន

ក្មេងស្រីដែលជាសិស្សបឋមបានលង់ទឹកស្លាប់ព្រមៗគ្នាគួរអោយសង្វេគ ខណ:​​នាំគ្នា​ចុះទៅងូត​ទឹកលេងក្នុងស្រះទឹកខាងក្រោយ​សាលា។

ហេតុការណ៍​ដ៏​គួរ​ឲ្យ​រន្ធត់នេះ​បាន​កើត​ឡើងកាល​ពីថ្ងៃទី ៣០ ខែ មីនាឆ្នាំ ២០២៣ ប្រហែល​ម៉ោង ១២ ថ្ងៃត្រង់​នៅក្នុងស្រះទឹក​មួយកន្លែង ខាងក្រោយសាលាបឋមសិក្សា ស្រឡៅទង ស្ថិត​ក្នុងភូមិ​ស្រឡៅទង ឃុំកំរៀង ស្រុកកំរៀង ខេត្តបាត់ដំបង។

បើតាមសម្តីប្រជាពលរដ្ឋបានបញ្ជាក់ថា នៅមុនពេលកើតហេតុគឺ​ក្រុម​គ្រួសារក្មេងទាំង ៥ នាក់ បានបាត់កូនស្រីរៀងៗខ្លួន​ដោយ​មិនឃើញចេញពីសាលាត្រឡប់ទៅផ្ទះ ទើបមានការឆោរឡោព្រម​ទាំង​បានប្តឹងទៅសមត្ថកិច្ចប៉ុស្តិ៍ផងដែរ ដើម្បីជួយអន្តរាគមន៍។

នៅពេលនោះដែរ ប្រជាពលរដ្ឋនៅក្នុងភូមិ​បាននាំគ្នាដើរ​រកនៅក្នុងសាលា​ផង និង​ទីតាំងផ្សេងៗផងរហូត​ដល់ម៉ោង ៥ និង ២០ នាទី ល្ងាច ថ្ងៃដដែល ក៏បាន​ទៅដល់​មាត់ស្រះ​ទឹក​ខាងក្រោយ​សាលាទើបមានការ​សង្ស័យថា ក្មេងៗទាំងអស់ប្រាកដជាលង់នៅក្នុងស្រះទឹក ដោយសារ​តែមាន​បន្សល់​របស់របរមួយចំនួននៅទីនោះ ទើប​នាំគ្នាចុះរាវរកក៏​បានប្រទះឃើញ​ក្មេងស្រីទាំងអស់នោះមែន។

ក្មេងស្រីទាំង៥ នាក់ នោះមានឈ្មោះ÷១.ឈ្មោះ វុធ អី អាយុ៧ឆ្នាំ ២.ឈ្មោះ ជា ស្រីឌឿន អាយុ១១ឆ្នាំ ៣.ឈ្មោះ លួង លីតា អាយុ៩ឆ្នាំ ៤.ឈ្មោះ ធីម ម៉េងលី អាយុ៩ឆ្នាំ និង ៥.ឈ្មោះ វ៉ាន់ គឹមហៀង អាយុ៩ឆ្នាំ ដោយក្មេងស្រីទាំង៥នាក់នេះ រស់នៅក្នុងភូមិ ឃុំ កើតហេតុខាងលើ។

តាមការចុះពិនិត្យពីសំណាក់សមត្ថកិច្ចជំនាញបានអះអាងថា ក្មេងទាំង ៥នាក់ គឺ​ស្លាប់​ដោយសារ​លង់ទឹកពិត​ប្រាកដមែន ហើយនៅពេលនេះ​សាកសពកំពុងរៀបចំធ្វើបុណ្យតាមប្រពៃណី ប្រកប​ដោយភាពសោកសង្រែងជាទីបំផុត៕

អត្ថបទ÷ សោ និយមរ័ត្ន