ព្រោះតែរឿងគាស់សព ខ្មាន់កាំភ្លើងបាញ់ ប្តីប្រពន្ធ បណ្តាលឲ្យប្រពន្ធស្លាប់ ប្តីរងរបួសធ្ងន់

បុរសម្នាក់ជាខ្មាំងកាំភ្លេីងដែលបាញ់ប្តីប្រពន្ធនៅស្រុកជេីងព្រៃ ខេត្តកំពង់ចាម ពេលនេះសមត្ថកិច្ចបញ្ជាក់អត្តសញ្ញាណខ្លះ ហេីយ ខណៈជនល្មើសបានប្លុងចោលរថយន្តនៅវត្តផ្អាវ។

តាមប្រភពពីសមត្ថកិច្ចបានឲ្យដឹងថា ខ្មាំងកាំភ្លេីងម្នាក់ដែលគេស្គាល់ឈ្មោះ ឆេង សេងហៅធីវ អាយុ៤០ឆ្នាំ រស់នៅផ្ទះបុរីឈូកវ៉ា២ រាជធានីភ្នំពេញ មានមុខរបរជា លក់គ្រឿងតុបតែងឡាន បានជិះរថយន្ត ម៉ាក ព្រូស ពណ៌ទឹកប្រាក់ ពាក់ស្លាកលេខ ភ្នំពេញ ២BL-8356 ប្រដាប់ដោយអាវុធ ខ្លីមួយដើម មិនស្គាល់ម៉ាក បាញ់ទៅលើជនរងគ្រោះ ពីរនាក់ប្តីប្រពន្ធ។

ប្រភពពីសមត្ថកិច្ចបញ្ជាក់ទៀតថា ហេតុការណ៍ នេះ បានកេីតឡេីង នៅវេលាម៉ោង១២ ថ្ងៃត្រង់ ត្រូវនឹងថ្ងៃទី១១ ខែឧសភា ឆ្នាំ ២០២៣ នៅចំណុចផ្ទះជនរងគ្រោះ ដែលរស់នៅក្នុងភូមិអណ្ដូងត្រាំង ឃុំស្រម៉រ ស្រុកជើងព្រៃ ខេត្តកំពង់ចាម ។ មូលហេតុ ដែលឈានដល់ការបាញ់ប្រហារបែបនេះ គឺដោយសារ ទំនាស់ពាក្យសម្តីគ្នា ដោយជនរងគ្រោះឲ្យជនបង្កគាស់សពជីដូនជីតាចេញពីដី ដេីម្បីងាយស្រួលទិញលក់ នេះបេីតាមចម្លេីយបញ្ជាក់ពីកូនប្រុសជនរងគ្រោះ។

ជនរងគ្រោះ ឈ្មោះ ផុន សុភ័ណ អាយុ ៣៩ឆ្នាំ ត្រូវជាប្តី ត្រូវរបួសចំដៃ និងសៀតផ្កា របួសធ្ងន់ នៅមុខផ្ទះរបស់ខ្លួនត្រូវដឹកបញ្ជូនទៅសង្គ្រោះភ្លាមៗនៅរាជធានីភ្នំពេញ។ ចំណែកឯ ប្រពន្ធ ឈ្មោះ ចិន ចាន់ណា អាយុ៤០ឆ្នាំ រងរបួសចំខ្ទង់ច្រមុះចន្លោះភ្នែក០១គ្រាប់ដេកស្លាប់ភ្លាមៗ នៅនឹងកន្លែង។

ក្រោយធ្វើសកម្មភាពជនល្មេីសបេីករថយន្តទៅទិសខាងលិច រហូតវត្តផ្អាវ បានទុករថយន្តចោលក្នុងវត្ត រួចរត់គេចខ្លួនបាត់ បច្ចុប្បន្ន សមត្ថកិច្ចកំពុងធ្វេីការស្រាវជ្រាវ៕

អត្ថបទ៖ ឡេក ចាន់ពេជ្រ