ស្នងការរាជធានីភ្នំពេញ បញ្ជាឲ្យនាំមន្រ្តីនគរបាលចរាចរណ៍មួយរូបមកព្រមានលើកទី១

ឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនៃស្នងការដ្ឋាននគរបាលរាជធានីភ្នំពេញ បានបញ្ជាឲ្យនាយការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ នាំខ្លួនមន្រ្តីនគរបាលចរាចរណ៍មួយរូបដែលឈរអនុវត្តច្បាប់ចរាចរណ៍នៅគោលដៅស្តុបបូកគោផ្ទុយនឹងបទបញ្ជាមកព្រមានជាលើកទី១។

ការនាំខ្លួនមកអប់រំ និងធ្វើការព្រមានលើកទី១មន្ត្រីនគរបាលចរាចរណ៍ដែលអនុវត្តផ្ទុយនឹងបទបញ្ជានេះ បានធ្វើឡើងបន្ទាប់ពីមានគណនីហ្វេសប៊ុកមួយបានបង្ហោះចែកចាយនៅលើសង្គមថា «ថតម៉ោង​៩:១៣​ នាទី​ ព្រឹក​ថ្ងៃទី​៨​កញ្ញា​ ឆ្នាំ២០២៣​ ស្តុប​បូកគោ​! ពួកគាត់​មិនគោរព​ មិនស្ដាប់​បទបញ្ជា​របស់​ស្នងការ​ទេ​ សំខាន់​ប៉ុស្តិ៍​ពួកស្ទាក់​នេះ​ជា​មុខ​របររកលុយរបស់ពួកគាត់​!»។

យោងតាមក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ បានឲ្យដឹងនៅព្រឹកថ្ងៃទី៨កញ្ញា នេះថា ក្រោយទទួលបាននៃការបង្ហោះព័ត៌មាននេះ លោកឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនៃស្នងការដ្ឋាននគរបាលរាជធានីភ្នំពេញ បានបញ្ជាទៅលោកនាយការិយាល័យនគរបាលចរាចរណ៍ផ្លូវគោក រាជធានីភ្នំពេញ ឱ្យនាំមន្រ្តីនគរបាលចរាចរណ៍រូបនោះយកមកអប់រំ និងធ្វើការព្រមានលើកទី១ ដើម្បីឱ្យកែប្រែឥរិយាបថ។

បើតាមលោកឧត្តមសេនីយ៍ទោ ជួន ណារិន្ទ ជុំវិញបញ្ហាការពួនស្ទាក់របស់មន្រ្តីនគរបាលចរាចរណ៍នេះ គឺត្រូវតែលប់បំបាត់ ប៉ុន្តែការអនុវត្តន៍ច្បាប់ចរាចរណ៍ផ្លូវគោកនៅតែបន្តអនុវត្តដើម្បីពង្រឹងសណ្តាប់ធ្នាប់សុវត្ថិភាពចរាចរណ៍។

ជាមួយគ្នានេះ លោកស្នងការរាជធានីភ្នំពេញ ក៏បានសំណូមពរដល់ប្រជាពលរដ្ឋធ្វើដំណើរលើដងផ្លូវនានាក្នុងរាជធានីភ្នំពេញ មេត្តាចូលរួមគោរពច្បាប់ចរាចរណ៍ទាំងអស់គ្នាដើម្បីសុខសុវត្ថិភាពខ្លួនឯង និងអ្នកទៃ៕