លម្អិតបន្ថែមករណីឆេះផ្ទះ និងតូបអ្នកលក់ដូរនៅផ្សារក្រោម ដែលបណ្ដាលឱ្យស្លាប់មនុស្ស ៣នាក់

កាលពីថ្ងៃទី២៧ ខែធ្នូ ឆ្នាំ២០២៣ វេលាម៉ោង៤៖៥០នាទី មានអគ្គិភ័យមួយបានកើតឡើង ស្ថិតនៅ ក្រុមទី២ ភូមិវិហារចិន សង្កាត់ស្វាយដង្គំ ក្រុងសៀមរាប។ អគ្គិភ័យនោះបានឆាប់ឆេះផ្ទះ១ខ្នង តូបលក់ដូរចំនួន៤ នៅមុខផ្សារក្រោម និងបណ្ដាលឱ្យស្លាប់មនុស្សចំនួន ៣នាក់ និងខូចខាតទ្រព្យសម្បត្តិចំនួនប្រមាណជា១០ម៉ឺនដុល្លារ។

បើតាមសមត្ថកិច្ច ករណីអគ្គិភ័យដែលឆាប់ឆេះបណ្ដាលឱ្យឆេះតូបលក់ដូរអស់ចំនួន ៤តូប និងផ្ទះចំនួន ១ខ្នង នេះ (ខូចខាតទាំងស្រុង) មានម្ចាស់ផ្ទះជួលតូបឈ្មោះ លី ដារី ភេទស្រី អាយុ៣២ ឆ្នាំមុខរបរលក់ដូរ។ ករណីនេះ បានបណ្ដាលឱ្យមនុស្សស្លាប់ចំនួន ៣នាក់ រួមមានទី១.ឈ្មោះ វ៉ឹក ឡាន ភេទស្រី អាយុ២៧ឆ្នាំ មុខរបរ លក់ដូរ,ទី២.កូននៅក្នុងផ្ទៃ ដែលមានអាយុ២ខែ និងទី៣.ឈ្មោះ ង៉ិក ឌី ភេទប្រុស អាយុ ៤ឆ្នាំ។ ចំណែក ផ្ទះចំនួន ១ល្វែង ធ្វើពីថ្ម ប្រកសង័្កសី (ទំហំ៥ ម×១០ម) ខូចខាតទាំងស្រុង ៤តូប ,ម៉ូតូចំនួន១គ្រឿង,ទូរទឹកកកចំនួន១គ្រឿង,ទូរបោកខោអាវចំនួន១គ្រឿង, កុំព្យូទ័រលេបថបចំនួន១គ្រឿង, ទូរស័ព្ទចំនួន៣គ្រឿង, អង្ករទម្ងន់៧តោន, ពងមាន់ និងពងទាចំនួន ៨២០០គ្រាប់, សាច់ជ្រូកទម្ងន់ ៤០គីឡូក្រាម និងមាន់ធ្វើរួចចំនួន៨ក្បាល។

សមត្ថកិច្ចបានបន្តថា តាមការត្រួតពិនិត្យរបស់គណៈកម្មការនៅកន្លែងកើតហេតុបានសន្និដ្ឋានថា ករណីអគ្គិភ័យឆាបឆេះនេះ គឺបណ្តាលមកពីទុស្សេខ្សែភ្លើង និងបានប្រើប្រាស់រថយន្តពន្លត់អគ្គិភ័យអស់ចំនួន៦គ្រឿង។ គួរជម្រាបថា នៅក្នុងករណីនោះ គេឃើញមានវត្តមានថ្នាក់ដឹកនាំខេត្ត និងសមត្ថកិច្ចពាក់ព័ន្ធចុះធ្វើកោសល្យវិច័យ និងចូលរួមសោកស្តាយចំពោះគ្រួសាររងគ្រោះផងដែរ៕

ដោយ៖ជុន កុសល