បញ្ជូនជនសង្ស័យ​ ២ នាក់ពាក់ព័ន្ធគ្រឿងញៀនជាង ១ តោនទៅតុលាការ

នៅព្រឹកថ្ងៃទី២៣ ខែមករា ឆ្នាំ២០២៤ កម្លាំងកងរាជអាវុធហត្ថខេត្តព្រះវិហារ សហការជាមួយកម្លាំងកងរាជអាវុធហត្ថលើផ្ទៃប្រទេស បានបញ្ជូនជនសង្ស័យចំនួន២នាក់ ទៅសាលាដំបូងខេត្តព្រះវិហារ ដើម្បីអនុវត្តតាមនីតិវិធីច្បាប់ ពាក់ព័ន្ធបទល្មើសគ្រឿងញៀនជាង១តោន។

សូមរំលឹកថា កាលពីថ្ងៃទី២០ ខែមករា ឆ្នាំ២០២៤ គ្រឿង​ញៀន​ទាំង​នោះ​ត្រូវ​បាន​រក​ឃើញ​នៅ​ក្នុង​រថយន្ត​មួយ​គ្រឿងដែលក្រុម​ឧក្រិដ្ឋ​ជន​បាន​យក​ទៅ​ផ្លុង​ចោលនៅ​ខាង​មុខ​វិទ្យាល័យ​ជ័យ​សែន ​ក្នុង​ស្រុក​ជ័យ​សែន ​ខេត្ត​ព្រះ​វិហារ។ គ្រឿងញៀនដែលត្រូវបានគេរកឃើញនេះមានចំនួន២៥ធុង ស្មើនឹង១,០៨២.៥គីឡូក្រាម (គ្រឿងញៀនសុទ្ធចំនួន១,០២១.២គីឡូក្រាម) និងសម្ភារៈមួយចំនួនទៀត។

ពាក់ព័ន្ធករណីនេះ នៅព្រឹកថ្ងៃទី២៣ ខែមករា ឆ្នាំ២០២៤ កម្ពុជាថ្មី បានទំនាក់ទំនងទៅលោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសដើម្បីសុំការបញ្ជាក់ តែត្រូវបានលោកបដិសេធន៍ ដោយសារការស៊ើបអង្កេតកំពុងតែធ្វើមិនទាន់បញ្ចប់ក្រោមការដឹកនាំសម្របសម្រួលពីពីអយ្យការ ដោយលោកស្នើឲ្យសួរអយ្យការតែម្ដង។

លោក វុធ សារី អ្នកនាំពាក្យនៃអយ្យការអមសាលដំបូងខេត្តព្រះវិហារ នៅព្រឹកថ្ងៃទី២៣មករានេះ កម្ពុជាថ្មី ក៏បានទំនាក់ទំនងតាមលេខទូរស័ព្ទដើម្បីសុំការបំភ្លឺផងដែរ តែទូរស័ព្ទចូលគ្មានអ្នកលើក៕