រកឃើញយានយន្ដល្មើសសរុប២៣៤គ្រឿង និងល្មើស​ជាតិអាលកុល២៣នាក់ ក្នុងយុទ្ធនាការរឹតបន្តឹងច្បាប់ចរាចរណ៍កាលពីយប់មិញ

ក្នុងយុទ្ធនាការរឹរបន្តឹងច្បាប់ចរាចរណ៍ផ្លូវគោកទូទាំងរាជធានីភ្នំពេញ កាលពីយប់ថ្ងៃទី២៥ ខែមករា ឆ្នាំ២០២៤ កម្លាំងនគរបាលនៃស្នងការដ្ឋាននគរបាលរាជធានីភ្នំពេញ បានរកឃើញយានយន្ដល្មើសច្បាប់សរុបចំនួន២៣៤គ្រឿង និងអ្នកល្មើសជាតិអាល់កុលសរុប២៣នាក់ ករណីនេះត្រូវបានកម្លាំងនគរបាលអនុវត្តទៅតាមវិធានការណ៍ច្បាប់រួចហើយដែរ។ នេះបើតាមការបញ្ជាក់របស់លោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ ប្រាប់ កម្ពុជាថ្មី នៅព្រឹកថ្ងៃទី២៦មករានេះ។

លោកវរសេនីយ៍ឯក សំ វិច្ឆិកា បញ្ជាក់ថា ក្នុងយុទ្ធនាការអនុវត្តការរឹតបន្តឹងច្បាប់ចរាចរណ៍ផ្លូវគោកនៅក្នុងរាជធានីភ្នំពេញកាលពីយប់ថ្ងៃទី២៥ ខែមករា ឆ្នាំ២០២៤ កម្លាំងនគរបាលបានឃាត់យានយន្ដល្មើសច្បាប់សរុបចំនួន២៣៤គ្រឿង ក្នុងនោះមានរថយន្ដ៥គ្រឿង។ ចំណែកអ្នកបើកបរស្ថិតក្នុងស្ថានភាពស្រវឹងមានសរុប២៣នាក់ ក្នុងនោះកម្រិតជាតិអាល់កុលចាប់ពី០.២៥ ទៅ 0.៣៩ មានចំនួន៧នាក់ និងចាប់ពី០.៤០ឡើងមានចំនួន១៦នាក់។ បើតាមលោក សំ វិច្ឆិកា ចំពោះយានយន្ដល្មើស និងអ្នកបើកបរស្ថិតក្រោមគ្រឿងស្រឹងគឺកម្លាំងបានអនុវត្តវិធានការច្បាប់រួចហើយ។

អ្នកពាក្យនៃស្នងការដ្ឋាននគរបាលរាជធានីភ្នំពេញ បានបន្ថែមថា ពាក់ព័ន្ធការចុះអនុវត្តរឹតបន្តឹងច្បាប់ចរាចរណ៍ផ្លូវគោកកាលពីយប់ថ្ងៃទី២៥មករា គឺមិនមានអ្វីកើតឡើងគួរឲ្យកត់សម្គាល់នោះទេ ដោយសារមានប្រជាពលរដ្ឋច្រើនបានចូលរួមគោរពច្បាប់ចរាចរណ៍ផ្លូវគោក ជាពិសេសអ្នកបើកបរ។

លោកបញ្ចាក់ថា ការអនុវត្តនេះ គឺជាការអនុវត្តដ៏តឹងតែង និងយកវិធានការច្បាប់ជាគោល និងជំនាញដែលជាការណែនាំនិងដាក់បទបញ្ជាផ្ទាល់ពីសំណាក់លោកឧត្ដមសេនីយ៍ឯក ជួន ណារិន្ទ អគ្គស្នងការរង និងស្នងការនៃស្នងការដ្ឋាននគរបាលរាជធានីភ្នំពេញ ដោយមិនមានការយោគយល់ និងហាមដាច់ខាតមិនឲ្យមានការអន្តរាគមន៍នោះទេ ក្នុងករណីមានការអន្តរាគមន៍ណាមួយ ជាពិសេសអ្នកបើកបរក្នុងស្ថានភាពស្រវឹង គឺកម្លាំងនឹងធ្វើរបាយការណ៍ជូនថ្នាក់ដឹកនាំតែម្ដង៕

អត្ថបទ៖ សុខុម