ឃាត់ខ្លួនអ្នករត់ពន្ធគ្រឿងញៀនទៅប្រទេសកូរ៉េ ២នាក់ តាមអាកាសយានដ្ឋានអន្តរជាតិភ្នំពេញ

មន្ត្រីនៃនាយកដ្ឋានគយ និងរដ្ឋាករអាកាសយានដ្ឋានអន្តរជាតិភ្នំពេញ បានឃាត់ខ្លួនជនសង្ស័យសញ្ជាតិកូរ៉េប្រុសស្រី២នាក់ បន្ទាប់ពីពិនិត្យឃើញម្សៅពណ៌សជាច្រើនកញ្ចប់ រុំជាប់នឹងដងខ្លួន និងបានប្រគល់ឲ្យមន្ទីរប្រឆាំងបទល្មើសគ្រឿងញៀនអនុវត្តបន្តតាមនីតិវិធីច្បាប់។

ការឃាត់ខ្លួននេះបានធ្វើឡើងការលពីយប់ថ្ងៃទី៣ ខែមីនា ឆ្នាំ២០២៤ នៅស្ថានីយអ្នកដំណើរចេញនៃអាកាសយានដ្ឋានអន្តរជាតិភ្នំពេញ។ បើតាមរបាយការណ៍ ជនសង្ស័យទាំង២នាក់មានសញ្ជាតិកូរ៉េ បានធ្វើដំណើរតាមជើងយន្តហោះ ZA215 ក្នុងគោលដៅឆ្ពោះទៅប្រទេសកូរ៉េ។

តាមលទ្ធផលតេស្តបឋមដោយមន្ត្រីជំនាញនៃមន្ទីរប្រឆាំងបទល្មើសគ្រឿងញៀន ម្សៅពណ៌សទាំងនោះ គឺជាគ្រឿងញៀនប្រភេទ Methamphetamine ទម្ងន់ ១ ២៩០,៧៩ ក្រាម និងប្រភេទ Katamine ទម្ងន់ ៩៨៧,៤២ ក្រាម។ ជនសង្ស័យ និងវត្ថុតាង រួមទាំងសម្ភាររបស់ជនសង្ស័យត្រូវបានប្រគល់ជូនមន្ទីរប្រឆាំងបទល្មើសគ្រឿងញៀនដើម្បីគ្រប់គ្រង ថែរក្សា និងចាត់ការបន្តតាមនីតិវិធីច្បាប់៕

អត្ថបទ៖ សុខុម