ឃាត់ខ្លួនចិនតៃវ៉ាន់ម្នាក់ទៀតរត់ពន្ធគ្រឿងញៀនតាមអាកាសយានដ្ឋានអន្តរជាតិភ្នំពេញ

មន្ត្រីនៃនាយកដ្ឋានគយ និងរដ្ឋាករអាកាសយានដ្ឋានអន្តរជាតិភ្នំពេញ នៅយប់ថ្ងៃទី១០ ខែមីនា ឆ្នាំ២០២៤ បានឃាតខ្លួនបុរសជនជាតិចិនតៃវ៉ាន់ម្នាក់ពាក់ពាក់ព័ន្ធគ្រឿងញៀនជិត៥គីឡូក្រាម។

ការឃាត់ខ្លួននេះ បានធ្វើឡើងនៅស្ថានីយអ្នកដំណើរចេញនៃអាកាសយានដ្ឋានអន្តរជាតិភ្នំពេញ ខណៈដែលអ្នកដំណើរសញ្ជាតិចិនតៃវ៉ាន់រូបនេះធ្វើដំណើរតាមជើងយន្តហោះ K6-818 ក្នុងគោលដៅឆ្ពោះទៅប្រទេសជប៉ុន។

តាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា បានឲ្យដឹងថា តាមការត្រួតពិនិត្យលើដងខ្លួន មន្ត្រីគយ និងរដ្ឋាករបានរកឃើញម្សៅពណ៌សចំនួន ៣៥កញ្ចប់ រុំជាប់នឹងដងខ្លួនរបស់អ្នករូបនោះ។ តាមលទ្ធផលតេស្តបឋមដោយមន្ត្រីជំនាញនៃមន្ទីរប្រឆាំងបទល្មើសគ្រឿងញៀន ម្សៅពណ៌សទាំងនោះជាគ្រឿងញៀនប្រភេទMethamphetamine មានទម្ងន់ ៤ ៩៦៥,៣០ ក្រាម។ បច្ចុប្បន្ន ជនសង្ស័យ វត្ថុតាង និងសម្ភាររបស់ជនសង្ស័យ ត្រូវបានប្រគល់ជូនមន្ទីរប្រឆាំងបទល្មើសគ្រឿងញៀន ដើម្បីគ្រប់គ្រង ថែរក្សា និងចាត់ការបន្តតាមនីតិវិធីច្បាប់។

សូមរំលឹកថា ការលពីយប់ថ្ងៃទី៣ ខែមីនា ឆ្នាំ២០២៤ នៅស្ថានីយអ្នកដំណើរចេញនៃអាកាសយានដ្ឋានអន្តរជាតិភ្នំពេញ មន្ត្រីនៃនាយកដ្ឋានគយ និងរដ្ឋាករអាកាសយានដ្ឋានអន្តរជាតិភ្នំពេញ ក៏បានឃាត់ខ្លួនជនសង្ស័យ២នាក់មានសញ្ជាតិកូរ៉េ ពាក់ព័ន្ធករណីគ្រឿងញៀនជាង២គីឡូក្រាមផងដែរ ខណៈដែលជនសង្ស័យទាំងពីរនាក់នោះធ្វើដំណើរតាមជើងយន្តហោះ ZA215 ក្នុងគោលដៅឆ្ពោះទៅប្រទេសកូរ៉េ៕

អត្ថបទ៖ សុខុម