អ្នកនាំពាក្យ៖ ករណីបាញ់សម្លាប់សា្វមីម្ចាស់ប្រេន Lakamo ជនដៃដល់បានធ្វើអត្តឃាតខ្លួនឯងតាមក្រោយ(មានវីដែអូ)

លោកវរសេនីយ៍ឯក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ នៅរសៀលថ្ងៃទី១១ ខែមេសានេះបានឲ្យ កម្ពុជាថ្មី ដឹងថា ពិតជាមានករណីបាញ់សម្លាប់ជនរងគ្រោះជាម្ចាស់ផ្ទះពិតប្រាកដមែន ចំណែកជនដៃដល់ដែលចូលទៅក្នុងផ្ទះជនរងគ្រោះក៏បានធ្វើអត្តឃាតបាញ់សម្លាប់ខ្លួនឯងតាមក្រោយ។

លោកវរសេនីយ៍ឯក សំ វិច្ឆិកា មិនបានបញ្ជាក់ថាជាករណីចាប់ជម្រិត ឬប្លន់នៅឡើយទេ ដោយលោកបញ្ជាក់ថា ករណីនេះគឺកម្លាំងអាវុធហត្ថរាជធានីជាម្ចាស់ករណី ហើយក៏កំពុងធ្វើការស្រាវជ្រាវផងដែរ។

ជនរងគ្រោះត្រូវបានគេស្គាល់ថា ឈ្មោះ ឈួរ ឈុនហួរ អគ្គនាយករង ក្រុមហ៊ុន ព្រីមៀរ៍ ផាក ត្រូវជាស្វាមីម្ចាស់ផលិតផល Lakamo ត្រូវបានជនដៃដល់បាញ់សម្លាប់ចំក្បាលបណ្ដាលឲ្យសា្លប់ភ្លាមៗនៅក្នុងផ្ទះ និងបានទារប្រាក់ចំនួន២០ម៉ឺនដុល្លារ តែដោយមានការឡោមព័ទ្ធពីកម្លាំងអាវុធហត្ថនៅខាងក្រៅ ជនដៃដល់ក៏បានបាញ់សម្លាប់ខ្លួនឯងតែម្ដង៕