នគរបាលខេត្តបន្ទាយមានជ័យឃាត់ខ្លួនជនស្ស័យពីរនាក់ ពាក់ព័ន្ធករណីជួញដូរគ្រឿងញៀន

ជនសង្ស័យប្រុស ស្រី ២នាក់ ដឹកជញ្ជូនថ្នាំញៀនជាទ្រង់ទ្រាយធំយកទៅលក់ត្រូវបានកំលាំងនគរបាលប្រឆាំងបទល្មើសគ្រឿងញៀនបង្ក្រាបបាននៅវេលាម៉ោង១២យប់ ថ្ងៃទី២០ ខែមេសា ឆ្នាំ២០២៤ នៅចំណុចផ្ទះជនសង្ស័យ ក្នុងភូមិ មិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

នគរបាលប្រឆាំងបទល្មើសគ្រឿងញៀនបានប្រាប់ឲ្យដឹងថា ការបង្ក្រាបគ្រឿងញៀនទ្រង់ទ្រាយធំនេះអនុវត្តតាមបទបញ្ជា របស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ក្រោយពីទទួលបានព័ត៍មានពីប្រជាពលរដ្ឋផង កម្លាំងការិយាល័យប្រឆាំងគ្រឿងញៀន សហការជាមួយកម្លាំងអធិការដ្ឋាននគរបាលក្រុងប៉ោយប៉ែត បានចុះទៅដល់ផ្ទះជនសង្ស័យ និងបានធ្វើការឃាត់ខ្លួនជនសង្ស័យ ប្រុស ស្រី២នាក់ និងបានដកហូតវត្ថុតាងរួមមាន ម្សៅម៉ត់សថ្លា(MDMA)ចំនួន០១ថង់ ទម្ងន់២.១១ក្រាម សាច់ថ្នាំសុទ្ធ ថ្នាំកញ្ចប់រូបទំពាំងបាយជូរមានអក្ស Grapa fraittea (MDMA)ចំនួន៥០០កព្ចាប់ ទម្ងន់៤.៤៧០ក្រាម សាច់ថ្នាំសុទ្ធ ថ្នាំកញ្ចប់ពណ៌ក្រហម រូបសេះ​(MDMA)​ចំនួន៥០០កព្ចាប់ស្មើទម្ងន់ ២.៣០៥ក្រាម សាច់ថ្នាំសុទ្ធ សរុបចំនួន ៦៧៧៧.១១ ក្រាម សាច់ថ្នាំសុទ្ធ ទូរសព្ទដៃចំនួន ២ គ្រឿង រថយន្តចំនួន១គ្រឿងម៉ាក ម៉ាកព្រូសពណ៍ស។

កម្លាំងការិយាល័យប្រឆាំងគ្រឿងញៀនបានឲ្យដឹងបន្តទៀតថា ជនសង្ស័យទាំង២នាក់ឈ្មោះ ហេង សុ គុណ ហៅ ប៉ាវ ភេទ ប្រុស អាយុ៤៥ឆ្នាំ ជាអ្នកជួញដូរគ្រឿងញៀនរស់នៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ឈ្មោះ ចឹម ស្រីដា ហៅ ជូ ភេទស្រី អាយុ២៤ឆ្នាំ រស់នៅភូមិអូឬស្សីលើ សង្កាត់អូឬស្សី ក្រុងប៉ោយប៉ែត ខេត្តបន្ទាយមានជ័យ។

ក្រោយពីបង្ក្រាបហើយជនសង្ស័យទាំង២នាក់បានបញ្ជូនមកស្នងការនគរបាលខេត្តបន្ទាយមានជ័យ ដើម្បីសាកសួរ និងធ្វើរបាយការណ៍តាមនិតិវិធី។ លុះនៅព្រឹកថ្ងៃទី២២ ខែមេសា ឆ្នាំ២០២៤ កម្លាំងជំនាញ នៃស្នងការដ្ឋាននគរបាលខេត្ត បន្ទាយមានជ័យ បានកសាងសំណុំរឿងបញ្ជូនខ្លួនជនសង្ស័យទាំង២នាក់ ដើម្បីបន្តនីតិវិធីច្បាប់ទៅកាន់សាលាដំបូង ខេត្តបន្ទាយមានជ័យ៕

អត្ថបទ៖ វ៉ាន់ ណាង