ស្នងការខេត្តកំពង់ស្ពឺបញ្ជាឲ្យកម្លាំងគ្រប់ក្រុងស្រុកត្រៀមជួយសង្គ្រោះពលរដ្ឋពីជំនន់ទឹកភ្លៀង

លោកឧត្ដមសេនីយ៍ទោ ឃឹម សុខខៃ ស្នងការនៃស្នងការដ្ឋាននគរបាលខេត្តកំពង់ស្ពឺ បានបញ្ជាឲ្យកម្លាំងគ្រប់អធិការដ្ឋានក្រុង ស្រុកទាំង៩ ត្រូវត្រៀងសម្ភារៈមធ្យោបាយ ដើម្បីជួ​យសង្រ្គោះប្រជាពលរដ្ឋពីគ្រោះជំនន់ទឹកភ្លៀង ក្នុងពេលចាំបាច់ប​ន្ទាន់។ ការបញ្ជាបែបនេះ បានធ្វើឡើងបន្ទាប់ពីប៉ុន្មា​នថៃ្ងនេះនៅក្នុងភូមិសាស្ដ្រខេត្តកំពង់ស្ពឺ មានភ្លៀងធ្លាក់ជាប់ៗគ្នា និងបណ្ដាលឲ្យស្រុកចំនួន២មានការជនលិច។ នេះបើតាមការផ្សព្វផ្សាយរបស់គេហទំព័រហ្វេសប៊ុកស្នងការខេត្តនៅព្រឹកថ្ងៃទី១៨កក្កដានេះ។

តាមសំណេររបស់គេហទំព័រហ្វេសប៊ុកស្នងការខេត្ត បានឲ្យដឹងថា ដោយសារស្ថានភាពភ្ញៀងធ្លាក់ជាប់គ្នាប៉ុន្មា​នថៃ្ងនេះ បានបង្កអោយមានជំនន់ទឹកភ្ញៀងជន់លិចក្នុងភូមិសាស្រ្ដ​ខេត្ត​កំពង់ស្ពឺ​ ក្នុងនោះមានស្រុកគងពិសី​ ស្រុក​ប​សេ​ដ្ឋ​ នឹងអាចបង្កទៅកាន់ស្រុកមួយ​ចំនួនទៀតដែលស្ថិត​នៅប៉ែកខា​ងក្រោមនៃចរន្ដទឹកហូរ។ ក្នុងន័យនេះ លោកឧត្តមសេនីយ៍ទោ​ស្នងការខេត្ត បានជំរុញអោយអធិការក្រុង​ ស្រុក​ ត្រូវបង្កើនការក្ដាប់សភាពការណ៍ចុះដល់មូលដ្ឋាន​ឃុំ​ សង្កាត់​ និងពិនិត្យ​បន្ទាន់​លើហានិភ័យដែលអាចនឹងកើតមានក្នុងករណី​ប្រធាន​ស័ក​នេះ​ ដោយត្រូវត្រៀមនូវសម្ភារៈ​ មធ្យោបាយ​សង្រ្គោះ​ និងកម្លាំង​។

បើតាមក្រសួងធនធានទឹក និងឧតិនិយម បានឲ្យដឹងថា ចាប់ពីថ្ងៃទី១៨ ដល់២០កក្កដានេះ ប្រព័ន្ធសម្ពាធទាបគ្របដណ្ដប់លើសមុទ្រចិនខាងត្បូង សមុទ្រ Andaman ភាគកណ្តាល និងខាងកើតឈូងសមុទ្រថៃ លើព្រះរាជាណាចក្រកម្ពុជា និងភាគកណ្តាលនៃអាងទន្លេមេគង្គ និងបណ្តាលឱ្យរបបខ្យល់មូសុងនិរតីមានឥទ្ធិពលកាន់តែខ្លាំងមកលើព្រះរាជាណាចក្រកម្ពុជា។ ស្ថានភាពបែបនេះ នឹងធ្វើឲ្យព្រះរាជាណាចក្រកម្ពុជា មានភ្លៀងធ្លាក់លាយឡំជាមួយខ្សល់កន្ត្រាក់ចាប់ពី៣៥ភាគរយ ទៅ៥០ភាគរយ៕

អត្ថបទ៖ សុខុម