ស្លាប់​យុវជន​ម្នាក់​ ពេល​បើកបរត្រាក់ទ័រភ្ជួរដី​កិន​ចំ​មីនតោន​បន្សល់ពីសម័យ​សង្រ្គាម

យុវជនម្នាក់បានស្លាប់ភ្លាមៗ ខណៈដែលកំពុងបើកបរត្រាក់ទ័រភ្ជួរដីចម្ការ ក៏បានកិនទៅលើគ្រាប់មីនតោន ដែលនៅសេះសល់​ពីសម័យសង្គ្រាមបណ្ដាលឲ្យផ្ទុះឡើងយ៉ាងពេញទំហឹងតែម្ដង។

ហេតុការណ៍ដ៏រន្ធត់នេះបានកើតឡើងកាលពីថ្ងៃទី១៥ ខែសីហា ឆ្នាំ២០២៤ វេលាម៉ោង ៣ និង៤៥នាទី រសៀល ដោយសារ​មានសំឡេងផ្ទុះមីន (តោន) ១លើក ស្ថិតនៅចំណុចក្រុមទី០៦ ស្ថិតក្នុងភូមិជីប៉ាង ឃុំផ្លូវមាស ស្រុករតនមណ្ឌល ខេត្តបាត់ដំបង។

យោងតាមការបញ្ជាក់ពីសមត្ថកិច្ចនៃអធិការដ្ឋាននគរបាលស្រុករតនមណ្ឌល នៅមុនពេលកើតហេតុ ជនរងគ្រោះឈ្មោះ វ៉ាត សាវ៉ុន ភេទប្រុស អាយុ ២៣ ឆ្នាំ រស់នៅភូមិភ្ជាវ ឃុំត្រែង ស្រុករតនមណ្ឌល បានបើកបរត្រាក់ទ័រចេញទៅស៊ីឈ្នួលភ្ជួរដីចម្ការឲ្យប្រជាពលរដ្ឋនៅចំណុចខាងលើ។ ខណ:កំពុងធ្វើការភ្ជួរដីចំការនោះ កង់ត្រាក់ទ័របានកិនទៅលើគ្រាប់មីន បណ្ដាលឲ្យផ្ទុះលាន់ឮសំឡេងកងរំពង ដែល​បាន​ធ្វើឲ្យយុវជនរងគ្រោះ​ស្លាប់នៅនិងកន្លែងភ្លាមៗតែម្ដង។

ក្រោយពេលកើតហេតុ សពជនរងគ្រោះ​ត្រូវបានក្រុមគ្រួសារនាំយកទៅធ្វើបុណ្យ។ ចំពោះបញ្ហានេះសមត្ថកិច្ចក៏បានបញ្ជាក់ដែរថា ជា​មីនតោនសេសសល់កាលពីសម័យសង្គ្រាម ហើយដោយសារតែការភ្ជួររាប់​ឆ្នាំធ្វើឲ្យ​គ្រាន់មីនកាន់តែអណ្ដែតមកលើនិងបណ្ដាលផ្ទុះតែម្ដងខណៈដែលទម្ងន់ត្រាក់ទ័រសង្កត់​ពីលើ៕

អត្ថបទ៖ សោ និយមរ័ត្ន