ស្នងការរាជធានីច្រានចោលការផ្សព្វផ្សាយរបស់​អាខោនតិចតុកមួយចំនួនដែលយកវីដេអូតាំងពីឆ្នាំ២០១៣មកបង្ហោះបង្កើតព្រឹត្តិការណ៍ថ្មី

ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ នារសៀលថ្ងៃទី១៨សីហានេះ បានប្រកាសច្រានចោលការផ្សព្វផ្សាយរបស់អាខោនតិចតុកមួយចំនួនដែលយកវីដេអូចាស់តាំងពីឆ្នាំ២០១៣ មកបង្ហោះបង្កើតព្រឹត្តិការណទថ្មី បង្កឲ្យពលរដ្ឋមានការយល់ច្រឡំ។

តាមការបញ្ជាក់របស់ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ សភាពការណ៍សន្តិសុខ សណ្តាប់ធ្នាប់នៅក្នុងរាជធានីភ្នំពេញ ចាប់ពីព្រឹកព្រលឹមថ្ងៃទី១៨ ខែសីហា ឆ្នាំ២០២៤ រហូតមកដល់រសៀលថ្ងៃដដែល គឺពុំមានបាតុកម្មតវ៉ាណាមួយក្នុងរាជធានីភ្នំពេញនោះទេ ប្រជាពលរដ្ឋធ្វើដំណើរប្រកបមុខរបររកស៊ីជាធម្មតា មិនមានអ្វីកើតឡើងនោះឡើយ។

ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ ក៏អំពាវនាវឱ្យប្រជាពលរដ្ឋជឿជាក់លើ​ការដឹកនាំរបស់រាជរដ្ឋាភិបាលកម្ពុជា គឺធានាសន្តិសុខ សណ្តាប់ធ្នាប់សុវត្ថិភាព ជូនប្រជាពលរដ្ឋឱ្យបានជាដាច់​ខាតទោះក្នុងតម្លៃណាក៏ដោយ ហើក៏បានប្រកាសថ្កោលទោសដាច់អហង្ការចំពោះក្រុមជនអគតិតែងតែមានគំនិតទុច្ចរិតផ្សព្វផ្សាយព័ត៌មានមិនពិតញុះញង់បង្កចលាចលសង្គម និងបានឱ្យសមត្ថកិច្ចជំនាញស្រាវជ្រាវជាបន្ទាន់នាំជនអគតិទាំងនេះយកមកអនុវត្តតាមផ្លូវច្បាប់ផងដែរ។

សូមជម្រាបថា នៅថ្ងៃទី១៨ ខែសីហា ឆ្នាំ២០២៤ មានអាខោនតិកតុក(TIKTOK)មួយចំនួនរបស់ក្រុមជ្រុលនិយមបានផ្សព្វផ្សាយយករូបភាពវីដេអូចាស់ការធ្វើបាតុកម្មកាលពីឆ្នាំ២០១៣ យកមកបង្ហោះឡើងវិញបង្កើតជាព្រឹត្តិការណ៍ថ្មីក្លែងក្លាយ ក្នុងគោលបំណងបំភ្លៃបំផ្លើសព័ត៌មានខុសពីការពិត ដើម្បីឱ្យប្រជាពលរដ្ឋមានការយល់ច្រឡំ ឱ្យសម្រេចបានតាមផែនការទុច្ចរិតពិសពុលរបស់ក្រុមជ្រុលនិយមក្នុងការញុះញង់បង្កឱ្យកើតមានចលាចលក្នុងសង្គម៕

អត្ថបទ៖ សុខុម