ពលរដ្ឋនៅមូលដ្ឋានសង្កាត់បឹងកេងកងទី១ ស្នើអាជ្ញាធរជួសជុលផ្លូវមួយខ្សែកំពុងខូចខាតខ្លាំង

ប្រជាពលរដ្ឋរស់នៅក្នុងមូលដ្ឋានសង្កាត់បឹងកេងកងទី១ ខណ្ឌបឹងកេងកង ស្នើឲ្យអាជ្ញាធរជួយជួសជុលផ្លូវលេខ៣២២ កែងផ្លូវមុនីវង្ស ដែលកំពុងរងការខូចខាតខ្លាំងពិបាកក្នុងការធ្វើដំណើរ។

បើតាមការបញ្ជាក់ពីលោក តក់ ជាប្រជាពលរដ្ឋរស់នៅក្នុងមូលដ្ឋានបានអោយដឹងថា កាលពីមុនផ្លូវនេះខូចតែបន្តិចបន្តួចបណ្ណោះ ប៉ុន្តែតាំងពីមានការដ្ឋានសាងសង់អាគារតំបន់នោះមក ផ្លូវខាងលើនេះចាប់ផ្តើមខូចខាតកាន់តែខ្លាំងទៅៗ ដោយ​សារមកពីកត្តារថយន្ដដឹកដី រថយន្ដក្រឡុកសុីម៉ង់ជាដើម ដែលបង្កអោយកើតមាននូវជង្ហុកសំបុកមាន់កាន់តែច្រើនស្ទើរ​តែជិះមិនកើតតែម្តង។ លោកក៏បានសំណូមពរដល់អាជ្ញាធរជួយចុះត្រួតពិនិត្យ និងជួសជុលចំណុចផ្លូវរងការខូចខាតនេះផង ព្រោះថា ខូចខាតប្រហែលប្រវែងជិត១០០ ម៉ែត្រតែប៉ុណ្ណោះ។

លោក សុខ សម្បត្តិ អភិបាលខណ្ឌបឹងកេងកង បានប្រាប់អោយដឹងថា ចំពោះកំណាត់ផ្លូវកំពុងរងការខូចខាតនេះ គឺស្ថិតនៅក្នុងគម្រោងអភិវឌ្ឍន៍សង្កាត់ឆ្នាំ២០២៤ របស់រដ្ឋបាលខណ្ឌបឹងកេងកង។ លោកអភិបាលបន្តថា ដោយសារ​តែ​គម្រោងមានច្រើន ដូច្នេះហើយផ្លូវដែលខូចខាតនេះ អាជ្ញាធរនឹងផ្តើមការជួសជុលនៅចុងឆ្នាំ២០២៤នេះតែម្តង៕

អត្ថបទ៖ រដ្ឋា