អាជ្ញាធរខណ្ឌសែនសុខចុះបង្ក្រាបទីតាំងល្បែងស៊ីសងខុសច្បាប់ដកហូតសម្ភារមួយចំនួន

ដោយអនុវត្តតាមបញ្ជាររបស់លោក ម៉ូវ ម៉ានិត អភិបាលនៃគណៈអភិបាលខណ្ឌសែនសុខ បានចាត់លោក សាំង សុភៈវិចិត្រ អភិបាលរងខណ្ឌ ដឹកនាំកម្លាំងចុះបង្រ្កាបទីតាំងល្បែងមាន់ជល់អនឡាញ M99 ស្ថិតនៅផ្ទះជួល ផ្លូវលេខ១០១១ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ​ កាលពីថ្ងៃទី២៣ ខែកញ្ញា ឆ្នាំ២០២៤ ។

លោក សាំង សុភៈវិចិត្រ អភិបាលរងខណ្ឌសែនសុខ បានអោយដឹងថា ដោយទទួលបានបទបញ្ជាពីលោកអភិបាលខណ្ឌ ដឹកនាំកម្លាំងចុះបង្រ្កាបទីតាំងល្បែងមាន់ជល់អនឡាញ M99 ជាលទ្ធផលបានដកហូតសម្ភារៈរួមមាន កុំព្យូរទ័រ ចំនួន១គ្រឿង,តុ ចំនួន ១, ដុំ Wifi ចំនួន ១គ្រឿង រីឯមនុស្សដែលប្រចាំការទទួលចាក់បានរត់គេចខ្លួនបាត់។

ប្រជាពលរដ្ឋមួយចំនួនបានលើកឡើងថា បញ្ហាអសន្តិសុខកើនឡើងគួរឱ្យព្រួយបារម្ភដែលបណ្តាលមកពីល្បែងស៊ីសងគ្រប់ប្រភេទកើតឡើងវិញនៅគ្រប់កន្លែង។

ក្នុងប្រតិបត្តិការចុះបង្ក្រាបនេះ លោក សាំង សុភៈវិចិត្រ ក៏បានសំណូមពរដល់ប្រជាពលរដ្ឋចូលរួមសហការ រាយការណ៍ នូវភាពអសន្តិសុខ ល្បែងស៊ីសងគ្រប់ប្រភេទមកកាន់អាជ្ញាធរ ឬសមត្ថកិច្ចកងកម្លាំង ដែលនៅជិតដោយនឹងរក្សាការសម្ងាត់​ជូនកុំបារម្ភ។ បច្ចុប្បន្នវត្ថុតាងត្រូវបានបញ្ជូនទៅអធិការដ្ឋាននគរបាលខណ្ឌសែនសុខ ដើម្បីធ្វើការស្រាវជ្រាវបន្ត៕

អត្ថបទ៖ សំណាង