ឆ្មក់បង្រ្កាបទីតាំងឆ្នោតវៀតណាមក្នុងផ្សារ​កាប់គោ ឃាត់ខ្លួនមនុស្ស៣នាក់

ទីតាំងកត់ឆ្នោតវៀតណាមខុសច្បាប់មួយកន្លែងក្នុងផ្សារ កាប់គោ ត្រូវបានកម្លាំងគណៈបញ្ជាការឯកភាពខណ្ឌចំការមន ចុះបង្ក្រាបឃាត់ខ្លួនបានមនុស្ស៣នាក់។

ប្រតិបត្តិការចុះបង្រ្កាបនេះបានធ្វើឡើងកាលពីវេលាម៉ោង០២និង១០នាទី រសៀលថ្ងៃទី២៦ ខែកញ្ញា ឆ្នាំ២០២៤ ចំណុចក្នុងផ្សារកាប់គោ តាមបណ្តោយផ្លូវលេខ០៩ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

ការចុះបង្ក្រាបល្បែងស៊ីសងប្រភេទឆ្នោតវៀតណាមនេះ គឺធ្វើឡើងបន្ទាប់ពីទទួលបានដំណឹងពីប្រជាពលរដ្ឋថាមានទីតាំងលួចលាក់បើកល្បែងឆ្នោតវៀតណាមខុសច្បាប់ ទើបលោក កៀង ល័ក្ខ អភិបាលខណ្ឌចំការមន បញ្ជារអោយកម្លាំងចុះទៅបង្រ្កាបភ្លាមៗ ដឹកនាំដោយលោក ម៉ៅ បូណែត អភិបាលរង នៃគណៈអភិបាលខណ្ឌចំការមន។

ក្នុងរង្វង់ប្រតិបត្តិការនេះ កម្លាំងគណៈបញ្ជាការខណ្ឌ បានដកហូតបានសម្ភារៈមួយចំនួនដូចជា ម៉ាស៊ីនគិតលេខចំនួន ០១គ្រឿង, ម៉ាស៊ីនព្រីនសន្លឹកឆ្នោត ចំនួន ០១គ្រឿង, ទូរស័ព្ទចំនួន ០៣គ្រឿង, ក្រដាសភស្តុតាង មួយចំនួនដែលបម្រើឱ្យការប្រកបល្បែងផ្សងសំណាង (ឆ្នោតវៀតណាម) និងមនុស្សចំនួន ០៣នាក់។

បច្ចុប្បន្នសម្ភារៈ និងមនុស្សទាំង០៣នាក់ខាងលើកម្លាំងបានប្រគល់ទៅឱ្យប៉ុស្តិ៍នគរបាលរដ្ឋបាលទន្លេបាសាក់ ដើម្បីបន្តនីតិវិធីច្បាប់។ ទន្ទឹមនេះ ក្រុមការងារសម្រេចបិទទ្វាឃ្មុំបេទីតាំងតូបលេខ១២ជាបណ្តោះអាសន្ន៕

អត្ថបទ៖ ម៉េង