រថយន្តដឹកភ្ញៀវទេសចរ ឆ្លងចរន្តរេចង្កូតបុករះរថយន្ត និង រ៉ឺម៉ក០២គ្រឿង បណ្ដាលឲ្យជនបរទេសរួមខ្មែរ ០៣នាក់ របួសធ្ងន់ស្រាល

ជនបរទេសរួមខ្មែរ ០៣នាក់ របួសធ្ងន់ស្រាលក្នុងករណីឆ្លងចរន្តអគ្គិសនីរថយន្ត ហើយបែរជារេចង្កូតបុករះរថយន្ត និងរ៉ឺម៉កក្នុងកោះពេជ្រ។ ករណីនេះបង្កមានការភ្ញាក់ផ្អើលកាលពីវេលាម៉ោង ១០ និង៤០នាទីព្រឹកថ្ងៃទី ២៦ ខែឧសភា ឆ្នាំ២០២៦ នៅក្នុងទីក្រុងកោះពេជ្រ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

តាមការបញ្ជាក់ពីប្រជាពលរដ្ឋបានអោយដឹងថា មុនកើតហេតុគេបានប្រទះឃើញរថយន្តប្រភេទ ដឹកភ្ញៀវទេសចរណ៍ យីហោ«Big Bus Angkor» ធ្វើដំណើរ ដឹកភ្ញៀវទេសចរណ៍ ០២នាក់ និងអ្នកបើកម្នាក់ តាមបណ្តោយផ្លូវ កោះពេជ្រ ទិសដៅពីជើងទៅត្បូង ខណៈមកដល់ ចំណុចកើតហេតុ រថយន្តខាងលើស្រាប់តែឆ្លងចរន្តចេញពីក្បាលរថយន្ត បង្កអោយមានផ្សែងហ៊ុយ ភ្លាមៗនោះអ្នកបើក គ្រប់គ្រង់ស្មារតីលែងបាន បណ្តាលអោយរថយន្តរេចង្កូត បុករថយន្ត តូយូតា មួយគ្រឿងស៊េរីទំនើប រួចបន្តទៅបុករះរម៉ក០២គ្រឿង បន្ថែមទៀត។

ប្រភពដដែលបន្តថា ស្របពេលនោះ រ៉ឺម៉កក៏ជាប់មកជាមួយរថយន្តបង្ក អូសប្រមាណជា ៦០ម៉ែត្រ ទើបកើតមានជាអណ្តាតភ្លើងឆាបឆេះយ៉ាងសន្ធោសន្ធៅតែម្តង។ ខណៈនោះបុរសជាអ្នកបើក និងភ្ញៀវបរទេសដែលជិះខាងលើរថយន្ត ក៏បានហក់ចុះមកក្រោម បង្កអោយរបួសធ្ងន់ស្រាល ០៣នាក់ បញ្ជូនទៅមន្ទីរពេទ្យ។

ក្រោយកើតហេតុ សមត្ថកិច្ចមូលដ្ឋាន បានចុះមកដល់ទីតាំងខាងលើ វាស់វែងយកទៅរក្សាទុករងចាំដោះស្រាយពេលក្រោយ ។ ចំពោះមូលហេតុ សមត្ថកិច្ចជំនាញបានស្រាវជ្រាវរកឃើញថា បណ្តាលមកពីឆ្លងចរន្តអគ្គិសនី ៕ អត្ថបទ ៖ រដ្ឋា