អាជ្ញាធរសង្កាត់ស្ទឹងមានជ័យទី៣ ឆ្មក់បង្រ្កាប​ល្បែងឆ្នោតឡូតូខុសច្បាប់២ទីតាំង ឃាត់ខ្លួនមនុស្ស២នាក់

កម្លាំងអាជ្ញាធរមានសមត្ថកិច្ចនៃរដ្ឋបាលសង្កាត់ស្ទឹងមានជ័យទី៣ ខណ្ឌមានជ័យ បានឆ្មក់ចុះបង្ក្រាបទីតាំងឆ្នោតឡូតូមួយកន្លែង ឃាត់ខ្លួនស្ត្រីពីរនាក់ និងដកហូតសម្ភារមួយចំនួនបញ្ជូនទៅប៉ុស្ដិ៍រដ្ឋបាលដើម្បីសួរនាំ។

ការបង្រ្កាបនេះដែរបានធ្វើឡើងនៅវេលាម៉ោង១២និង២២នាទីថ្ងៃត្រង់ ថ្ងៃទី១១ ខែតុលា ឆ្នាំ២០២៤ នៅតាមបណ្តោយផ្លូវលំ ក្នុងមូលដ្ឋានសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។

ក្នុងរង្វង់ប្រតិបត្តិការនេះ កម្លាំងសមត្ថកិច្ចបានឃាត់ខ្លួនស្ត្រីជាអ្នកកាន់ម៉ាសុីនកុំព្យូទ័រចំនួន២នាក់នៅនឹងកន្លែង និងបានដកហូតកុំព្យូទ័រចំនួន២គ្រឿង។

ការចុះបង្ក្រាបនេះ គឺធ្វើឡើងបន្ទាប់ពីកម្លាំងអាជ្ញាធរទទួលដំណឹងថា ទីតាំងទាំង២នេះ បានបង្កប់ល្បែងសុីសងខុសច្បាប់ ប្រភេទឆ្នោតឡូតូ ហើយក៏ត្រូវបានចុះទៅដល់ទីតាំងបង្រ្កាបភ្លាមៗតែម្តង។ បច្ចុប្បន្ន ស្ត្រីជនសង្ស័យទាំងពីរនាក់ខាងលើ ត្រូវបានបញ្ជូនទៅកាន់ប៉ុស្តិ៍នគរបាលរដ្ឋបាលមានជ័យទី៣ ដើម្បីចាត់ការតាមផ្លូវច្បាប់៕

អត្ថបទ៖ រដ្ឋា