កូនប្រុសបង្កើតកាប់សម្លាប់ម្ដាយវ័យ៨៤ឆ្នាំស្លាប់ក្នុងថ្លុកឈាម

ជនដៃដល់ជាកូនបង្កើតបានកាប់ប្រហារម្តាយខ្លួនឯងបណ្តាលឲ្យស្លាប់ភ្លាមៗនៅក្នុងផ្ទះ ស្ថិតក្នុងភូមិអូរអណ្តូង សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។ ទោះជាយ៉ាងណាជនដៃដល់ត្រូវបាននគរបាលចាប់ខ្លួនភ្លាមៗ ដែលជាជនមានជំងឺសរសៃប្រសាទ។

តាមប្រភពពីលោកវរសេនីយ៍ត្រី ព្រំ សុផល មេបញ្ជាការរងកងរាជអាវុធហត្ថខណ្ឌច្បារអំពៅ បានឲ្យដឹងថា ករណីឃាតកម្មនេះ បានកើតឡើងកាលពីវេលាម៉ោង៧និង៤០នាទីព្រឹក ថ្ងៃទី៧ ខែវិច្ឆិកា ឆ្នាំ២០២៤។ ស្រ្តីជាម្តាយដែលកូនប្រុសកាប់សម្លាប់បណ្តាលឲ្យស្លាប់ឈ្មោះ សង វណ្ណនី អាយុ៨៤ឆ្នាំ។ ចំណែកជនដៃដល់ឈ្មោះ ស្រេង ឆាយ ភេទប្រុសអាយុ៥៤ឆ្នាំ មុខរបរនៅផ្ទះ(មានជំងឺសសៃប្រសាទ)។

ប្រភពបានឲ្យដឹងថា នៅមុនពេលកើតហេតុ ស្ត្រីជាម្តាយកំពុងសម្រាកលើគ្រែក្នុងផ្ទះ រួចក៏ឮសម្លេងស្រែកហើយក៏បានឃើញជនដៃដល់កាន់កាំបិតចេញមកមុខផ្ទះ ប៉ុន្តែស្ត្រីរងគ្រោះបានស្លាប់បាត់ទៅ។ ចំណែកជនដៃដល់ត្រូវបានប្រជាពលរដ្ឋចាប់ខ្លួនប្រគល់ឲ្យនគរបាលប៉ុស្តិ៍ព្រែកប្រាចាត់ការតាមផ្លូវច្បាប់៕

អត្ថបទ៖ នរា