នគរបាលខេត្តស្វាយរៀង បំបែកសំណុំរឿងឃាតកម្មលើស្ត្រីជនពិកា​រ(គ)

កម្លាំងនគរបាលនៃស្នងការដ្ឋាននគរបាលខេត្តស្វាយរៀង សហការជាមួយកម្លាំងអធិការដ្ឋាននគរបាលស្រុកស្វាយទាប បំបែកសំណុំរឿងករណីឃាតកម្មលើជនរងគ្រោះជាស្ត្រីជនពិការ(គ) ក្រោយពីធ្វើសកម្មភាពវាយសម្លាប់រួចទម្លាក់ចូលក្នុងទឹកប្រឡាយ។ ក្នុងប្រតិបត្តិការឃាត់ខ្លួនជនដៃដល់នេះ កម្លាំងជំនាញបានដកហូតវត្ថុតាងមួយចំនួន និងប្រាក់ជាង៧លានរៀល។

ប្រតិបត្តិការឃាត់ខ្លួនជនសង្ស័យនេះ បានធ្វើឡើងបន្ទាប់ពីកម្លាំងជំនាញធ្វើកោសល្យវិច័យលើសាកសពជនរងគ្រោះដោយសន្និដ្ឋានថា ជាករណីឃាតកម្ម រហូតកំណត់អត្តសញ្ញាណជនសង្ស័យ និងឈានទៅធ្វើការឃាត់ខ្លួនជនសង្ស័យ១នាក់ ឈ្មោះ ប.ស.រ ភេទប្រុស អាយុ ២៥ឆ្នាំ នៅត្រង់ចំណុចភូមិអារ័ក្សស្វាយ ឃុំអណ្តូងពោធិ៍ ស្រុករមាសហែក។ ក្នុងនោះកម្លាំងជំនាញក៏បានដកហូត ម៉ូតូ ១គ្រឿង ទូរស័ព្ទដៃ១គ្រឿងប្រាក់រៀល ៧,១០០,០០០រៀល និងដំបង ២ដើម។

តាមចម្លើយសារភាពពីជនដៃដល់បានឲ្យដឹងថា ខ្លួនពិតជាបានយកដំបងវាយលើជនរងគ្រោះ បណ្តាលអោយស្លាប់ និងទម្លាក់ចូលក្នុងទឹកប្រឡាយពិតប្រាកដមែន។

តាមរបាយការណ៍របស់ស្នងការដ្ឋាននគរបាលខេត្តស្វាយរៀង បញ្ជាក់ថា កាលពីថ្ងៃទី២៣ ខែធ្នូ ឆ្នាំ២០២៤ វេលាម៉ោង៨និង៣០នាទី កម្លាំងជំនាញបានទទួលព័ត៌មានពីអាជ្ញាធរភូមិថា មានករណីមនុស្សលង់ទឹកប្រឡាយស្លាប់ ស្ថិតនៅភូមិព្រៃទទឹង ឃុំសំបួរ ស្រុកស្វាយទាប។ ជនរងគ្រោះ ឈ្មោះ ឡ.រ.ន ភេទស្រី អាយុ ២៨ឆ្នាំ ជាមនុស្ស គ នៅទីតាំងកើតហេតុ។ ក្រោយពីទួលបានព័ត៌មានកម្លាំងបានចុះដល់ទីតាំងកើតហេតុ និងធ្វើកោសល្យវិច័យលើសពជនរងគ្រោះទើបសន្និដ្ឋានថា ជាករណីឃាតកម្ម ទើបបើកការស៊ើបអង្កេតស្រាវជ្រាវឈានដល់ការចាប់ខ្លួនជនដៃដល់តែម្ដង៕

អត្ថបទ៖ សុខុម