ពលរដ្ឋសាទរចំពោះអាជ្ញាធរ ដែល​ស្ថាបនាផ្លូវបេតុងថ្មី ក្នុងមូលដ្ឋានសង្កាត់ស្ទឹងមានជ័យទី២

ប្រជាពលរដ្ឋរស់នៅតាមបណ្ដោយផ្លូវលេខ 5MC ក្នុងមូលដ្ឋានសង្កាត់ស្ទឹងមានជ័យ២ ខណ្ឌមានជ័យ បានសាទរចំពោះអាជ្ញាធរដែលបានយកចិត្តទុកដាក់ស្ថាបនាជាផ្លូវបេតុងថ្មី ដើម្បីសម្រួលដល់ការធើ្វដំណើរ និងប្រកបរបរប្រចាំថ្ងៃ។

លោកស្រី ផាត់ នី ជាអាជីវករលក់ដូរលើផ្លូវដែលទើបស្ថាបនារួចនេះបានលើកឡើងថា លោកស្រីក៏ដូចជាប្រជាពលរដ្ឋដទៃទៀតសប្បាយរីករាយជាខ្លាំងក្រោយឃើញអាជ្ញាធរយកចិត្តទុកដាក់ពីការលំបាកក្នុងការធើ្វដំណើររបស់ប្រជាពលរដ្ឋដូច្នេះ។

លោក ទូច សំអុល ចៅសង្កាត់ស្ទឹងមានជ័យទី២ បានប្រាប់ កម្ពុជាថ្មី អោយដឹងថា ផ្លូវមួយខ្សែនេះមានប្រវែង ៨៦៨ម៉ែត្រ បានរងការខូចខាតជាយូរណាស់មកហើយ ហើយក៏ធ្លាប់មានប្រជាពលរដ្ឋស្នើសុំពន្លឿនក្នុងការជួសជុលស្ថាបនាផងដែរ។ លោកចៅសង្កាត់បន្ថែមថា ផ្លូវមួយខ្សែនេះ អាជ្ញាធរបានប្រើប្រាស់ថវិកាអភិវឌ្ឍន៍សង្កាត់ក្នុងការស្ថាបនាឡើងវិញរួចរាល់ហើយ ដើម្បីសម្រួលដល់ការធើ្វដំណើររបស់ប្រជាពលរដ្ឋ។

បើតាមលោកចៅសង្កាត់ ផ្លូវបេតុងមួយខ្សែនេះជាគម្រោង ជួលជុលផ្លូវបេតុងគ្មានសរសៃដែក មានប្រវែង ៨៦៨ម៉ែត្រ ទទឹង៨ម៉ែត្រ កម្រាស់ ១.៥តឹក មានប្រព័ន្ធបង្ហូរទឹកលូរួចជាស្រេច៕

អត្ថបទ៖ ម៉េង