នគរបាលខេត្តតាកែវបំបែកសំណុំរឿងកាប់សម្លាប់នៅស្រុកសំរោង ខណៈជនដៃដល់រត់គេចខ្លួនដល់ខេត្តរតនគិរី

កម្លាំងនគរបាលនៃស្នងការដ្ឋាននគរបាលខេត្តតាកែវ បានសហការជាមួយកម្លាំងនគរបាលខេត្តរតនគិរី ស្រាវជ្រាវតាមចាប់ខ្លួនជនដៃដល់ម្នាក់ក្នុងសំណុំរឿងកាប់សម្លាប់ជនរងគ្រោះម្នាក់នៅមូលដ្ឋានស្រុកសំរោង។

ជនដៃដល់មានឈ្មោះ ព្រឿង រ៉ា ហៅហ៊ុយ ភេទប្រុស អាយុ២៩ឆ្នាំ ត្រូវបាននគរបាលខេត្ដរតនៈគិរីឃាត់ខ្លួននៅព្រឹកថ្ងៃទី១១ ខែមិថុនា ឆ្នាំ២០២៥ នៅចំនុចភូមិតាវែង ឃុំតាវែងលើ ស្រុកតាវែង បន្ទាប់ពីរត់គេចខ្លួនបាន៤ថ្ងៃ។ ចំណែកជនរងគ្រោះមានឈ្មោះ ហឿន សីហា ភេទប្រុស អាយុ៣៧ឆ្នាំ រស់នៅភូមិស្វាយរន្ធ ឃុំជំរះពេន ស្រុកសំរោង ខេត្តតាកែវ។

តាមរបាយការណ៍របស់ស្នងការដ្ឋាននគរបាលខេត្តតាកែវ ជនដៃដល់បានកាប់សម្លាប់ជនរងគ្រោះកាលពីថ្ងៃទី៧ ខែមិថុនា ឆ្នាំ២០២៥ នៅភូមិស្វាយរន្ធ ឃុំជំរះពេន ស្រុកសំរោង និងបានរត់គេចខ្លួនទៅសម្ងំលាក់ខ្លួននៅខេត្តរតនគិរីបានរយៈពេល៤ថ្ងៃ ក៏ត្រូវឃាត់ខ្លួនបាន។

តាមចម្លើយសារភាពរបស់ជនសង្ស័យ ករណីនេះផ្ដើមចេញពីរឿងគំនុំ «ខឹងរឿងជនរងគ្រោះធ្លាប់វាយខ្លួន ក៏កើតមានចិត្តគុំគួនថានឹងកាប់សម្លាប់សងសឹកវិញអោយបាន»៕