មន្ទីរព័ត៌មានខេត្តកំពង់ស្ពឺ ថា វីដេអូដែលផ្សព្វ​ផ្សាយ​លើបណ្ដាញសង្គមករណីលេងល្បែងក្នុងបរិវេណសាលាខេត្តជាវីដេអូចាស់

មន្ទីរព័ត៌មានខេត្តកំពង់ស្ពឺ កាលពីថ្ងៃទី៦ ខែសីហា ឆ្នាំ២០២៥ បានចេញមកបំភ្លឺពីការផ្សព្វផ្សាយនៃការលែងល្បែងស៊ីសងក្នុងបរិវេណសាលាខេត្តកំពង់ស្ពឺនៅលើបណ្ដាសារព័ត៌មានមួយចំនួន។ តាមរយៈសេចក្ដីបំភ្លឺ វីដេអូដែលបណ្តាញព័ត៌មាន និងអ្នកលេងបណ្តាញសង្គមបង្ហោះចែកចាយនេះ គឺជាវីដេអូចាស់រយៈពេលជិត១ឆ្នាំមកហើយ ហើយសាលាខេត្តក៏បានហៅបុគ្គលទាំងនោះមកអប់រំរួចហើយដែរ។

ការចេញមុខបំភ្លឺនេះ គឺបន្ទាប់ពីមានអ្នកលេងបណ្ដាញសង្គម និងអង្គភាពសារព័ត៌មានមួយចំនួនបានបង្ហោះរូបភាពភ្ជាប់ជាមួយខ្លឹមសារ ថា «ម៉្យាងដែរ… ល្បែងស៊ីសង នៅក្នុងបរិវេណសាលាខេត្តកំពង់ស្ពឺ ខុសទេ? លេងល្បែងស៊ីសង នៅក្នុងបរិវេណសាលាខេត្តកំពង់ស្ពឺ ស្ទើរសឹងរាល់ថ្ងៃ»។

តាមការបញ្ជាក់ពីមន្ទីរព័ត៌មានខេត្តកំពង់ស្ពឺ មន្ទីរព័ត៌មានខេត្តបានតាមដានករណីនេះដោយយកចិត្តទុកដាក់បំផុត ដើម្បីបញ្ជាក់ដល់អង្គភាពសារព័ត៌មាន និងអ្នកលេងបណ្តាញសង្គមបានដឹងការពិត កុំយល់ច្រឡំ និងបញ្ចេញមតិយោបល់ធ្វើឱ្យប៉ះពាល់ដល់ស្ថាប័ន និងថ្នាក់ដឹកនាំស្អាតស្អំដែលកំពុងគិតគូរ អំពីបញ្ហាសង្គ្រាមឈ្លានពានរបស់ថៃមកលើកម្ពុជា ដែលយើងទាំងអស់គ្នាត្រូវយកចិត្តទុកដាក់ដល់វិរៈកងទ័ពកំពុងការពារទឹកដី និងជនភៀសសឹក៕