ភាពខ្លាំងរបស់ ហុងកុង មានកីឡាករ ៦ នាក់លេងនៅលីគកំពូលប្រទេស ចិន

ក្រុមបាល់ទាត់ជម្រើស ចិនហុងកុង បានកោះហៅកីឡាករលេងនៅលីគកំពូល ចិន (Chinese Super League) ដល់ទៅ ៦ នាក់ សម្រាប់ការប្រកួតមិត្តភាពទល់នឹងក្រុមជម្រើសជាតិ កម្ពុជា នៅថ្ងៃ ព្រហស្បតិ៍ ទី ១៣ ខែ វិច្ឆិកា ឆ្នាំ ២០២៥។

ក្រុមហុងកុង បានប្រមូលផ្តុំកីឡាករសំខាន់ៗជាច្រើន ជាពិសេសមានកីឡាករលេងនៅលីគកំពូល ចិន ដល់ទៅ ៦ នាក់ ដើម្បីមកជួបក្រុមជម្រើសជាតិ កម្ពុជា នៅថ្ងៃ​ទី ១៣ ខែ វិច្ឆិកា។ ការប្រមូលផ្តុំរបស់ពួកគេលើកនេះ មិនត្រឹមតែសម្រាប់ការប្រកួតមិត្តភាពទល់ កម្ពុជា ប៉ុណ្ណោះទេ ប៉ុន្តែដើម្បីការប្រកួតសំខាន់នៅវគ្គជម្រុះពាន AFC Asian Cup ទល់នឹងក្រុមជម្រើសជាតិ សិង្ហបុរី នៅថ្ងៃទី ១៨ ខែ វិច្ឆិកា ឆ្នាំ ២០២៥។

ក្រឡេកមកមើលជំនួបថ្ងៃស្អែកនេះ កម្ពុជា អាចនឹងមិនងាយស្រួលឡើយ សម្រាប់ការលេងទល់នឹងក្រុម ហុងកុង ជាពិសេសត្រូវតទល់នឹងកីឡាករដែលលេងនៅលីគកំពូល ចិន។ កីឡាករទាំង ៦ នាក់ ដែល ហុងកុង កោះហៅមកពីក្រុមក្នុងលីគកំពូល ចិន រួមមាន ខ្សែការពារស្លាបស្តាំ Tze-Nam Yue (លេងនៅក្រុម MZ Hakka), ខ្សែការពារស្តាំ Alex Jojo (លេងនៅក្រុម Shanghai Port F.C.), ខ្សែការពារឆ្វេង Shinichi Chan (លេងនៅក្រុម SH Shenhua), ខ្សែការពារឆ្វេង Ming-Him Sun (លេងនៅក្រុម TJ Jinmen Tiger), ខ្សែប្រយុទ្ធស្លាបឆ្វេង Raphael Merkies (លេងនៅក្រុម SD Taishan) និងខ្សែប្រយុទ្ធកណ្តាល Matt Orr (លេងនៅក្រុម SZ Peng City)។

គួរឱ្យដឹងថា ក្រុមបាល់ទាត់ជម្រើសជាតិ កម្ពុជា មិនធ្លាប់មានប្រវត្តិឈ្នះ ហុងកុង ឡើយ ឡើយ​ ដោយរាប់ចាប់តាំងពីឆ្នាំ ១៩៥៧ មក។ ក្នុងនោះការជួបគ្នា ១០ លើក គឺ កម្ពុជា ទទួលបានលទ្ធផលស្មើ ២ លើក និងបរាជ័យ ៨ លើក៕

អត្ថបទ៖ សេម កុសល