សៀង ចន្ធា សោកស្ដាយដែលអវត្តមានប្រធានក្រុម ទេស សម្បត្តិ ពីក្រុម U23 កម្ពុជា ទៅចូលរួមស៊ីហ្គេម

ប្រធានក្រុមជម្រើសជាតិកម្ពុជា អាយុក្រោម ២៣ឆ្នាំ កីឡាករ ទេស សម្បត្តិ នឹងខកខានចូលរួមក្នុងព្រឹត្តិការណ៍កីឡាអាស៊ីអាគ្នេយ៍ លើកទី៣១ នៅប្រទេសវៀតណាម នាខែក្រោយនេះ បន្ទាប់ពីទទួលរងរបួសកជើង ខណៈជាមួយគ្នានេះអតីតមិត្តរួមក្រុម ខ្សែប្រយុទ្ធវ័យក្មេង សៀង ចន្ធា បានសម្ដែងការសោកស្ដាយដែលបានបាត់បង់ប្រធានក្រុមដ៏រឹងមាំនៅតំបន់ការពារ។

ទេស សម្បត្តិ បានរងរបួសកជើងខាងឆ្វេង ក្នុងពេលប្រកួតជាមួយគីរីវង់សុខសែនជ័យ កាលពីជំនួបសប្ដាហ៍ទី៣ ថ្ងៃទី២២ ខែមីនា ឆ្នាំ២០២២ កន្លងទៅថ្មីៗនេះ ខណៈគ្រូពេទ្យបានបញ្ជាក់ថារូបគេនឹងត្រូវសម្រាកប្រហែលជាលើស ៣សប្ដាហ៍ទៀត (គិតត្រឹមសប្ដាហ៍មុន) គ្រាដែលស៊ីហ្គេម ២០២២ នឹងមកដល់នៅអំឡុង ១សប្ដាហ៍ខាងមុខនេះ ដែលជាហេតុធ្វើឲ្យរូបគេពុំអាចជាទាន់ពេលវេលាឡើយ។ ដែលនាំឲ្យប៉ះពាល់ដល់កជើងខាងឆ្វេងនេះ គឺបន្ទាប់ពីរូបគេលោតតែតនិងធ្លាក់ជើងខុសបច្ចេកទេស។

ជុំវិញបញ្ហានេះ សៀង ចន្ធា បានប្រាប់ ‘កម្ពុជាថ្មី’ យ៉ាងដូច្នេះថា៖ «សម្រាប់ខ្ញុំ ហើយនឹងក្រុមពិតជាមានការសោកស្ដាយ ដោយសារតែយើងបាត់បងខ្សែការពារល្អម្នាក់ ហើយគាត់ក៏ជាប្រធានក្រុមជម្រើសជាតិ អ៊ីចឹងវាធ្វើឱ្យយើងមានការសោកស្ដាយមួយដែរ ហើយវាក៏អាចធ្វើឱ្យប៉ះពាល់អារម្មណ៍យើងដែរ ដោយសារតែយើងបាត់ខ្សែការពារមួយ។» 

«ប៉ុន្តែខ្ញុំគិតថាបាល់ទាត់គឺបែបនេះ ដោយសារតែពេលខ្លះយើងមើលមិនឃើញពីរបួសរបស់យើង អ៊ីចឹងយើងសង្ឃឹមថានឹងមានខ្សែការពារជាច្រើនទៀតដែលអាចជំនួសកន្លែងគាត់បាន ហើយក៏ជូនពរឱ្យគាត់ឆាប់ជាពីរបួស។» កីឡាកររបស់ក្លិបបឹងកេតរូបនេះបានបន្ថែម

ក្រុមបាល់ទាត់ជម្រើសជាតិកម្ពុជាអាយុក្រោម ២៣ឆ្នាំ ត្រូវបានចាប់ឆ្នោតស្ថិតទៅពូល B សម្រាប់ប្រភេទកីឡាបាល់ទាត់លើវិញ្ញាសាបាល់ទាត់បុរស ក្នុងព្រឹត្តិការណ៍កីឡាអាស៊ីអាគ្នេយ៍ លើកទី៣១ នៅប្រទេសវៀតណាម ដោយរួមពូលជាមួយក្រុមខ្លាំង U23 ថៃ, ម៉ាឡេស៊ី, សិង្ហបុរី និងឡាវ ខណៈ សៀង ចន្ធា ក៏ត្រូវបានគេរំពឹងថាជាប់ឈ្មោះក្នុងបញ្ជីកីឡាករ ២០នាក់ចុងក្រោយផងដែរ គ្រាដែលបច្ចុប្បន្នកំពុងប្រមូលផ្ដុំហ្វឹកហាត់ជាមួយកីឡាករ ២៥នាក់ផ្សេងទៀត ក្រោមការដឹកនាំផ្ទាល់ដោយ លោក Keisuke Honda និងគ្រូបង្វឹក លោក Ryu Hirose៕

អត្ថបទ៖ មន្នីរ័ត្ន