កីឡា

ជម្រើសជាតិកម្ពុជា ហ្វឹកហាត់ជុំគ្នាលើកដំបូងនៅថ្ងៃនេះ ក្រោយប្រមូលផ្ដុំគ្នាតាំងពីថ្ងៃទី ២៥

បានផុស

៤ years មុន

នៅ

ថ្ងៃចន្ទ ៣០ ឧសភា ២០២២

ដោយ

ក្រុមបាល់ទាត់ជម្រើសជាតិកម្ពុជា បាននិងកំពុងហ្វឹកហាត់យ៉ាងសកម្ម ដើម្បីត្រៀមការប្រកួតមិត្តភាពអន្ដរជាតិ ជាមួយក្រុមជម្រើសជាតិទីម័រខាងកើត នាល្ងាចថ្ងៃទី០២ ខែមិថុនា សប្ដាហ៍នេះនៅពហុកីឡដ្ឋានជាតិមរតកតេជោ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយនឹងការហ្វឹកហាត់នេះផងដែរ បានចាប់ផ្ដើមតាំងពីថ្ងៃទី២៥ ខែឧសភា មកម្ល៉េះ ប៉ុន្តែពុំទាន់ជុំគ្នានៅឡើយដោយសារតែមានកីឡាករមួយចំនួន ជាប់ភារកិច្ចជាមួយក្លិបនៅក្នុងការប្រកួតពានរង្វាន់ខេមបូឌានលីគខាប់ ពោលគឺកីឡាករនៃក្លិបភ្នំពេញក្រោន ៣ នាក់ និងកីឡាករនៃក្លិបវិសាខា ១០ នាក់។

យ៉ាងណាមិញនៅថ្ងៃនេះ តាមគម្រោងក្រុមទាំងមូលនឹងហ្វឹកហាត់ជុំគ្នាលើកដំបូងបន្ទាប់ការប្រកួតលីគខាប់ បានបញ្ចប់ជាផ្លូវការតាំងពីថ្ងៃទី ២៨ ខែឧសភា ជាមួយបញ្ជីឈ្មោះកីឡាករបឋមដែលត្រូវបានកោះហៅមាន ២៨ នាក់ មកពីក្លិប ៧ ផ្សេងគ្នាទាំងនៅលីគកំពូលកម្ពុជា និងលីគកំពូលម៉ាឡេស៊ី។ ដោយក្នុងនោះមានការផ្លាស់ប្ដូរសមាសភាពកីឡាករមួយចំនួនផងដែរ ជាក់ស្ដែងកីឡាករ ធារី ចន្ថាប៊ីន ត្រូវបានកោះហៅជំនួសខ្សែប្រយុទ្ធ លឹម ពិសុទ្ធ ដែលត្រូវបានអវត្តមានជាថ្មីដោយសារបញ្ហារបួស និងចុងក្រោយ ប្រាក់ ធីវ៉ា នៃក្លិបភ្នំពេញក្រោន ដែលត្រូវបានលោក Honda កោះហៅក្រោយគេ ដើម្បីត្រៀមការប្រកួតមិត្តភាពអន្ដរជាតិនេះ។

សូមបញ្ជាក់ថា ការប្រកួតមិត្តភាពអន្ដរជាតិរបស់ក្រុមគោព្រៃកម្ពុជា នឹងធ្វើឡើងនាថ្ងៃព្រហស្បតិ៍សប្ដាហ៍នេះ គឺដើម្បីពង្រឹងសមត្ថភាពត្រៀមការប្រកួតវគ្គចែកពូលពានរង្វាន់ AFC Asian Cup 2023 នៅប្រទេសឥណ្ឌាចាប់ពីថ្ងៃទី ០៨ ដល់ថ្ងៃទី ១៤ ខែមិថុនាខាងមុខ ដោយកម្ពុជាស្ថិតក្នុងពូល D ជាមួយម្ចាស់ផ្ទះឥណ្ឌា ហុងកុង និងអាហ្វហ្គានីស្ថាន៕

អត្ថបទ៖ មន្នីរ័ត្ន

Related Topics:ក្រុមបាល់ទាត់ជម្រើសជាតិកម្ពុជា