កីឡា

ល្ងាចនេះ ព្រះខ័នរាជស្វាយរៀងប៉ះក្រុមម៉ាឡេស៊ី UiTM FC

បានផុស

៤ years មុន

នៅ

ថ្ងៃចន្ទ ១៣ មិថុនា ២០២២

ដោយ

បន្ទាប់ពីទទួលបានជ័យជម្នះក្នុងការប្រកួតមិត្តភាពអន្តរជាតិលើកទី១ ក្រុមព្រះខន័រាជស្វាយរៀងរបស់កម្ពុជានឹងបន្តប្រកួតមិត្តភាពអន្តរជាតិលើកទី២ជាមួយក្រុមម៉ាឡេស៊ី UiTM FC វេលាម៉ោង៤រសៀលថ្ងៃចន្ទ ទី១៣ ខែមិថុនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះខន័រាជស្វាយរៀងបានធ្វើដំណើរទៅប្រទេសម៉ាឡេស៊ីដើម្បីប្រកួតមិត្តភាពកម្តៅសាច់ដុំ និងពង្រឹងសមត្ថភាព បច្ចេកទេសសម្រាប់ការត្រៀមខ្លួនមុនពេលជម្រើសជើងឯកខេមបូឌានព្រីមៀរលីគវិលត្រឡប់មកវិញ។

ការប្រកួតមិត្តភាពលើកទី១កាលពីថ្ងៃទី១០ ខែមិថុនា ព្រះខ័នរាជស្វាយរៀង បានយកឈ្នះ ក្រុម Petaling Jaya City FC របស់លីគកំពូលម៉ាឡេស៊ី ដោយ លទ្ធផល ១-០។ ក្រុមកម្ពុជាមួយនេះរកគ្រាប់បាល់ជ័យជម្នះនៅនាទីទី២០ ដោយកីឡាករ សួន សុវណ្ណ ហើយបានរក្សាលទ្ធផល ១-០ រហូតដល់ចប់ការប្រកួត។

ថ្ងៃនេះជាការប្រកួតលើកទី២ជួបក្រុម UiTM FC ដែលកំពុងលេងក្នុងក្រនខណ្ឌលីគទី២របស់ប្រទេសម៉ាឡេស៊ី។ ឆ្លងកាត់ការប្រកួត៩សប្តាហ៍នៅលីគទី២ ក្រុម UiTM FC រកបានតែ៧ពិន្ទុប៉ុណ្ណោះ និងកំពុងឈរលេខ៨ ក្នុងចំណោម១០ក្រុម។

ព្រះខ័នរាជស្វាយរៀងស្ថិតក្នុងចំណោមក្រុមលីគកម្ពុជាមួយចំនួនតូចដែលបានខិតខំប្រឹងប្រែង និងបង្កើនសមត្ថភាពអំឡុងពេលក្រុមបាល់ទាត់ជម្រើសជាតិកម្ពុជាជាប់បំពេញកាតព្វកិច្ចលើឆាកអន្តរជាតិ ខណៈការប្រកួតខេមបូឌានព្រីមៀរលីគបានសម្រាក។ ក្នុងនោះចេញប្រកួតមិត្តភាពអន្តរជាតិនៅប្រទេសម៉ាឡេស៊ី និងចុះកុងត្រាចូលសមាជិកថ្មីគឺនាំយកកីឡាករសញ្ជាតិអេស្ប៉ាញ Víctor Blasco លេងក្នុងតំណែងជាខ្សែបម្រើស្លាប។

សូមបញ្ជាក់ថា ព្រះខ័នរាជស្វាយរៀង ធ្វើបានល្អឥតខ្ចោះសម្រាប់ការប្រកួតខេមបូឌានព្រីមៀរលីគជុំទី១ ឆ្នាំ២០២២ បន្ទាប់ពីប្រកួត៧ ដង ឈ្នះ ៦ ដង និងស្មើ១ដង ដោយមាន១៩ពិន្ទុ កំពុងឈរកំពូលតារាង៕