ព្រះខ័នរាជស្វាយរៀង បរាជ័យលើកដំបូង ក្រោយមិនដែលចាញ់ ១៣ សប្ដាហ៍ជាប់ៗគ្នា

ក្លិបបាល់ទាត់ព្រះខ័នរាជស្វាយរៀង បានរងបរាជ័យលើកដំបូងក្នុងពានរង្វាន់ ខេមបូឌានព្រីមៀរលីគ ឆ្នាំ២០២២ ក្រោយចាញ់វិសាខា ០-១ ក្នុងជំនួបសប្ដាហ៍ទី ១៤ នៃជុំទី២ នាល្ងាចថ្ងៃទី ៦ ខែសីហា ឆ្នាំ២០២២។

ការប្រកួតដែលចាប់ផ្ដើមនៅវេលាម៉ោង ៦:៣០ នាទីល្ងាច ព្រះខ័នរាជស្វាយរៀង បានចាប់ផ្ដើមដាក់គំនាបលើក្រុមភ្ញៀវវិសាខា ដោយប៉ុនប៉ងរកគ្រាប់ម្ដងជាពីរដងតែធ្វើមិនបានសម្រេច ឯវិសាខា ក៏ដូចគ្នា និងធ្វើមិនបានសម្រេចឡើយ ហើយបានរក្សាលទ្ធផល ០-០ ដល់ចប់វគ្គទី១។

ចូលដល់វគ្គទី២ ព្រះខ័នរាជស្វាយរៀង ដែលត្រូវការជ័យជម្នះបានព្យាយាមរកគ្រាប់បាល់ទាត់បញ្ចូលទី ប៉ុន្តែនៅតែមិនអាចរកគ្រាប់បាល់បាន លុះចូលដល់នាទី ៨៤ វិសាខា ឯណោះវិញបានរកគ្រាប់បាល់ទាត់បញ្ចូលទីបានសម្រេចដោយកីឡាករ Paulo Victor នាទីដែលសេសសល់ ព្រះខ័នរាជស្វាយរៀង ព្យាយាមរកគ្រាប់បាល់តាមស្មើដែរ តែនៅតែមិនបានសម្រេច ហើយបានរក្សាលទ្ធផល ០-១ នេះដល់ចប់ការប្រកួត។

ទោះបរាជ័យ ព្រះខ័នរាជស្វាយរៀង នៅតែបន្តកាន់កាប់កំពូលតារាង នៃលីគកំពូលកម្ពុជា ឆ្នាំ២០២២ ត្រឹមសប្ដាហ៍ទី ១៤ ដោយមាន ៣៥ ពិន្ទុ តែក្រុមលេខ២ បឹងកេត តាមពីក្រោយ ៩ ពិន្ទុ។

ដោយឡែក ការប្រកួតដែលមានផ្សាយផ្ទាល់នៅលើហ្វេសប៊ុក “កម្ពុជាថ្មី” គិរីវង់សុខសែនជ័យ វិញបានស្គាល់ពាក្យថាឈ្នះលើកដំបូងក្នុងលីគ ពោលគឺបានយកឈ្នះ កងយោធពលខេមរភូមិន្ទ ១-០ ធ្វើឱ្យទទួលបាន ៣ ពិន្ទុដ៏មានសារៈសំខាន់៕

អត្ថបទ៖ មន្នីរ័ត្ន