លីគវៀតណាម ត្រៀមប្រើប្រាស់ VAR នៅឆ្នាំ២០២៣ ដោយចំណាយជិត ៣លានដុល្លារ

លីគកំពូលវៀតណាម(V League 1) គ្រោងនឹងប្រើប្រាស់ប្រព័ន្ធវីដេអូជំនួយការអាជ្ញាកណ្ដាល (Video Assistant Referee – VAR) នៅរដូវកាល២០២៣។

សារព័ត៌មានក្នុងស្រុកជាច្រើនបានចុះផ្សាយថា សហព័ន្ធកីឡាបាល់ទាត់វៀតណាម (VFF) កំពុងពិភាក្សាជាមួយក្រុមហ៊ុនលីគបាល់ទាត់អាជីពវៀតណាម (VPF) ក្នុងរយៈពេលប៉ុន្មានថ្ងៃកន្លងមកនេះ ទាក់ទងនឹងលទ្ធភាពនៃការអនុវត្តឡើងវិញនូវបច្ចេកវិទ្យាវីដេអូជំនួយការអាជ្ញាកណ្ដាល VRA នៅលីគកំពូលវៀតណាម។ កាលពីមុនបច្ចេកវិទ្យានេះត្រូវបានប្រើប្រាស់ក្នុងឆ្នាំ២០១៩ ប៉ុន្តែត្រូវផ្អាកទៅវិញដោយសារតែបញ្ហាបច្ចេកទេ។ 

អគ្គលេខាធិការ VFF លោក Le Hoai Anh បាននិយាយថា VAR អាចប្រើបានលុះត្រាតែលីគកំពូលវៀតណាម បំពេញតម្រូវការទាក់ទងនឹងធនធានមនុស្ស ទាំងធនធានអាជ្ញាកណ្ដាលជាមួយការបណ្ដុះបណ្ដាលគ្រប់គ្រាន់ និងហេដ្ឋារចនាសម្ព័ន្ធកីឡដ្ឋានដែលចាំបាច់ដូចគ្នាផងដែរ។

លោក Le Hoai Anh  បានឱ្យដឹងទៀតថា គម្រោងប្រើប្រាស់ VAR សហការជាមួយនឹង FIFA នឹងមានរយៈពេល១៣ខែ ហើយពេលវេលាដែលប្រើប្រាស់ប្រព័ន្ធនេះ គឺលឿនបំផុតដល់ដំណាច់ឆ្នាំ២០២៣។

ចំពោះការចំណាយដែលរំពឹងទុកដើម្បីដំណើរការប្រព័ន្ធ VAR ពេញលេញនៅក្នុងលីគកំពូលវៀតណាម ត្រូវបានគេប៉ានស្មានថាមានចំនួន ៧០ពាន់លានដុង ឬប្រហែល ២ ៩០០ ០០០លានដុល្លារអាមេរិក។ បញ្ជាក់ថា នៅអាស៊ីអាគ្នេយ៍​មានតែថៃ មួយគត់ ដែលបានប្រើប្រាស់ប្រព័ន្ធ VAR នេះ៕

អត្ថបទ៖ មន្នីរ័ត្ន