ការប្រកួត​កីឡា​ទោចក្រយាន​ជើងឯក​ថ្នាក់ជាតិ គ្រោង​រៀបចំ​ឡើងវិញ នា​ថ្ងៃទី​២៣ មករា​នៅ​ខេត្តសៀមរាប

ភ្នំពេញ ​៖ ការប្រកួត​កីឡា​ទោចក្រយាន ជ្រើសរើស​ជើងឯក​ថ្នាក់ជាតិ ប្រចាំឆ្នាំ​២០២០​គ្រោង​នឹង​រៀបចំ​ឡើងវិញ នា​ថ្ងៃទី​២២ ដល់​ថ្ងៃទី​២៤ ខែមករា ឆ្នាំ​២០២១ នៅ​ខេត្តសៀមរាប បន្ទាប់ពី​លើក​ពេល​កាលពី​ថ្ងៃទី​៤ ដល់​ថ្ងៃទី​៦ ខែធ្នូ ឆ្នាំ​២០២០ ដោយសារ​វិបត្តិ​ជំងឺ​កូ​វីដ​-១៩​។

បើ​តាម​លោក នូ ចំរើន អគ្គលេខាធិការ​សហព័ន្ធ​ខ្មែរ​កីឡា​ទោចក្រយាន បញ្ជាក់​ឲ្យ​ដឹង​កាលពី​ថ្ងៃទី​៥ ខែមករា ឆ្នាំ​២០២១​ម្សិលមិញ​នេះ​ថា ក្រោម​គម្រោង​ជំនួយ​ឧបត្ថម្ភ​របស់​ក្រសួង​អប់រំ យុវជន និង​កីឡា ការប្រកួត​កីឡា​ទោចក្រយាន​ជ្រើសរើស​ជើងឯក​ថ្នាក់ជាតិ ប្រចាំឆ្នាំ​២០២០ ត្រូវ​បាន​ធ្វើឡើង​តាម​គម្រោង​ផែនការ ដើម្បី​បន្តដំណើរ​ការអភិវឌ្ឍន៍​គុណភាព​បច្ចេកទេស និង​សម្រិតសម្រាំង​កីឡាករ កីឡាការិនី​ប្រកបដោយ​គុណភាព ដើម្បី​ត្រៀម​ចូលរួម​ប្រកួតប្រជែង​នៅក្នុង​ស៊ី​ហ្គេម លើក​ទី​៣១ នា​ខែវិច្ឆិកា ឆ្នាំ​២០២១ នៅ​ប្រទេស​វៀតណាម ក៏ដូចជា​សម្រួច​គោលដៅ​ឆ្ពោះទៅ​ទទួល​រៀបចំ​ធ្វើ​ម្ចាស់ផ្ទះ​ស៊ី​ហ្គេម លើក​ទី​៣២ ឆ្នាំ​២០២៣ នៅ​ព្រះរាជាណាចក្រ​កម្ពុជា​ជា​លើ​ដំបូង។

ចំពោះ​ប្រភេទ​វិញ្ញាសា ដែល​ត្រូវដាក់​ឪ្យ​ប្រកួត​មានដូចជា ១. កង់​គួ​ក​បុរស​ថ្នាល (Man Junior Road Bike) ២. កង់​គួ​ក​បុរស​ឈុត​ធំ​(Man Elte Road Bike) ៣. កង់​គួ​ក​បុរស​(Man Master Road Bike) ៤. កង់​ភ្នំ​បុរស​ថ្នាល​(Man Junior Mountain Bike) ៥. កង់​ភ្នំ​បុរស​ឈុត​ធំ​(Man Elite Mountain Bike) ៦. កង់​ភ្នំ​នារី​(Women Mountain Bike) ៧. កង់​ភ្នំ​បុរស​(Man Master Mountain Bike) ។

សូម​បញ្ជាក់​ថា ការប្រកួត​កីឡា​ទោចក្រយាន ជ្រើសរើស​ជើងឯក​ថ្នាក់ជាតិ ប្រចាំឆ្នាំ​២០២០​ឡើងវិញ​នេះ គឺ​បន្ទាប់ពី​ក្រសួង​អប់រំ យុវជន និង​កីឡា បានចេញ​សេចក្តីជូនដំណឹង​ស្តីពី​ការបើក​ដំណើរការ​ឡើងវិញ នូវ​អាជីវកម្ម​ក្លឹប​ហាត់ប្រាណ និង​លេង​កីឡា​ដើម្បី​សុខភាព ការប្រកួត​លី​គ និង​ការប្រមូលផ្ដុំ​របស់​ក្រុម​ជម្រើសជាតិ​ជា​ជំហានៗ ក្រោយ​ព្រឹត្តិការណ៍​សហគមន៍ ២៨ វិច្ឆិកា ត្រូវបាន​បញ្ចប់ ដោយ​ត្រូវគោរព​តាម​វិធាន​សុ​វត្តិភាព​សុខភាព​របស់​ក្រសួងសុខាភិបាល​ឱ្យបាន​ត្រឹមត្រូវ និង​ម៉ឺងម៉ាត់៕

ដោយ ៖ វិ​សិទ្ធ

សូមចុចអាន ៖ចុះព្រមានសិប្បកម្ម​ផលិត​ទឹកកក នៅ​ឬ​ស្សី​កែវ ក្រោយធ្លាយ​ឧស្ម័ន​ពុល បង្ក​ផល​ប៉ះ​ពាល់​ដល់​ពលរដ្ឋ

សូមចុចអាន ៖ អាជ្ញាធរ ចេញលិខិតកោះហៅគ្រូហុងស៊ុយ ​ដែលផ្សព្វផ្សាយស្ទីកឃ័រ (កាត់ឆុង)