ព័ត៌មានជាតិ

កីឡា ជាផ្នែកមួយដ៏សំខាន់សម្រាប់មនុស្សគ្រប់រូប

បានផុស

៥ ខែ មុន

នៅ

ថ្ងៃចន្ទ ១៧ វិច្ឆិកា ២០២៥

ដោយ

កីឡា មិនត្រឹមតែផ្តល់ឲ្យយើងនូវរបៀបរស់នៅដែលមានសុខភាពល្អប៉ុណ្ណោះទេ ប៉ុន្តែថែមទាំងមានឥទ្ធិពលយ៉ាងខ្លាំងទៅលើសុខុមាលភាពផ្លូវចិត្ត អារម្មណ៍ និងសង្គម។ កត្តានេះហើយ ទើបលោកឧត្ដមសេនីយ៍ត្រី សៀ ទីន មេបញ្ជាការ កងរាជអាវុធហត្ថខេត្តសៀមរាប បានរៀបចំព្រឹត្តិការណ៍រត់កម្សាន្ត (សាកល្បង) កាលពីព្រឹកចុងសប្ដាហ៍ថ្ងៃទី ១៦ ខែវិច្ឆិកា ឆ្នាំ ២០២៥ ដែលមានចម្ងាយ ៣ គីឡូម៉ែត្រ និង ៥ គីឡូម៉ែត្រ ដោយមានអស់លោក លោកស្រីជានាយ នាយរង និង ពលអាវុធហត្ថ រួមទាំងមានការចូលរួមពីមហាជនប្រមាណជាង ៣០០ នាក់ ផងដែរ។

លោកឧត្ដមសេនីយ៍ត្រី សៀ ទីន បានបញ្ជាក់ថា វិស័យកីឡានាពេលបច្ចុប្បន្ននៅកម្ពុជា បាននិងកំពុងមានការរីកចម្រើនទាំងបច្ចេកទេស ធនធានមនុស្សនៅតាមមូលដ្ឋានក្រុង-ស្រុកទៀតផង។ ការរៀបចំរបស់កងរាជអាវុធហត្ថខេត្តសៀមរាប ឲ្យមាននូវព្រឹត្តិការណ៍នេះឡើង ក្នុងគោលបំណងសុខភាព និង ផ្សារភ្ជាប់ជាមួយមហាជន ព្រមទាំងបំផុសដល់កងកម្លាំង និងគ្រប់ស្រទាបមហាជន សំខាន់យុវជនចូលរួមហាត់ប្រាណ ដើម្បីសុខភាព ធ្វើឲ្យកាយសម្បទារឹងមាំ និង យុវជនចាកចេញឆ្ងាយពីគ្រឿងញៀនទៀតផង។

លោកមេបញ្ជាការ បញ្ជាក់ទៀតថា ព្រឹត្តិការណ៍នេះ ជាផ្នែកមួយដើម្បីជំរុញ និងលើកកម្ពស់វិស័យទេសចរណ៍នៅក្នុងខេត្តសៀមរាប។ ការរត់ប្រណាំងនេះ ទទួលបានបទពិសោធមួយចំនួន ដើម្បីបន្តធ្វើការហ្វឹកហាត់កងកម្លាំងក្នុងការចូលព្រឹត្តិការណ៍ម៉ារ៉ាតុន ដែលតែងបានរៀបចំនៅក្រុងអង្គរ។

លោកមេបញ្ជាការ ក៏បានលើកនូវកម្មវិធីរត់កម្សាន្តនេះ នៅឆ្នាំ ២០២៦ អាវុធហត្ថខេត្ត បានកំណត់ក្នុងខែ ជួបជុំគ្នារត់កម្សាន្ត នៅពាក់កណ្តាលខែនីមួយៗ និង សូមឲ្យថ្នាក់ដឹកនាំ មន្ត្រីរាជការ កងកម្លាំង និង ប្រជាពលរដ្ឋ យុវជន សិស្សានុសិស្ស អញ្ជើញចូលរួម។