កម្ពុជា ខានជួប ថៃ ២៥ ឆ្នាំហើយ ខណៈល្ងាចនេះ នឹងបង្កើនប្រវត្តិជួបគ្នាដល់លើកទី ១៦

ក្រុម​បាល់ទាត់​ជម្រើស​ជាតិ​កម្ពុជា នឹង​ទៅ​សួរសុខទុក្ខ​ម្ចាស់ផ្ទះ ក្រុម​ជម្រើស​ជាតិ​ថៃ នា​ល្ងាច​ថ្ងៃ​ទី ០២ ខែ​មករា ឆ្នាំ ២០២៣ នេះ ខណៈ​បើ​ក្រឡេក​មក​មើល​ប្រវត្តិ​ជួប​គ្នា ក្រុម​ទាំងពីរ​ខកខាន​ជួប​គ្នា រយៈពេល​ជាង ២៥ ឆ្នាំ​ហើយ។

យោង​តាម​ប្រវត្តិ​ជួប​គ្នា កម្ពុជា ជាមួយ ថៃ គឺ​ធ្លាប់​ជួប​គ្នា​ចំនួន ១៥ ដង គិត​ចាប់​តាំងពី​ឆ្នាំ ១៩៥៧ ហើយ​ជា​លទ្ធផល ថៃ បាន​យកឈ្នះ ៩ ដង និង​ស្មើគ្នា ៤ ដង ខណៈ​កម្ពុជា ឈ្នះ​តែ ២ ដង​គត់។

អ្វី​ដែល​គួរ​ឲ្យ​ចាប់​អារម្មណ៍​បំផុត​នោះ ក្រុម​ទាំងពីរ​ខាន​ជួប​គ្នា​រយៈពេល ២៥ ឆ្នាំ​មក​ហើយ ដោយ​បាន​ជួប​គ្នា​លើក​ចុង​ក្រោយ​កាលពី​ថ្ងៃ​ទី ១២ ខែ​តុលា ឆ្នាំ ១៩៩៧ ក្នុង​ព្រឹត្តិការណ៍​កីឡា​ស៊ី​ហ្គេម លើក​ទី ១៩ នៅ​ប្រទេស​ឥណ្ឌូណេស៊ី (​កាល​នោះ​គេ​ប្រកួត​ដោយ​ប្រើប្រាស់​ក្រុម​ឈុត​ធំ មិនទាន់​ប្រកួត U-23 ដូច​សព្វថ្ងៃ​នៅឡើយ​)។ ខាងក្រោម​គឺ​លទ្ធផល នៃ​ប្រវត្តិ​ជួប​គ្នា​របស់​ក្រុម​ទាំងពីរ ៖

-០១ កញ្ញា ១៩៥៧ ៖ ថៃ ៣-០ កម្ពុជា (​ពាន​មិត្តភាព Merdeka នៅ​ម៉ាឡេស៊ី​)

-០១ កញ្ញា ១៩៦៤ ៖ ថៃ ១-០ កម្ពុជា (​ពាន​មិត្តភាព Merdeka នៅ​ម៉ាឡេស៊ី​)

-០៥ ឧសភា ១៩៧១ ៖ ថៃ ៤-៣ កម្ពុជា (​ពាន​មិត្តភាព Presidents Cup នៅ​កូរ៉េ​)

-២១ ឧសភា ១៩៧១ ៖ ថៃ ១-១ កម្ពុជា (Asian Cup – វគ្គ​ជម្រុះ​)

-០១ មិថុនា ១៩៧១ ៖ ថៃ ៤-២ កម្ពុជា (Asian Cup – វគ្គ​ជម្រុះ​)

-១៤ មិថុនា ១៩៧១ ៖ កម្ពុជា ៣-០ ថៃ (​ពាន​មិត្តភាព Jakarta Anniversary Tournament នៅ​ឥណ្ឌូណេស៊ី​)

-១២ ធ្នូ ១៩៧១ ៖ កម្ពុជា ១-១ ថៃ (SEA Games – កាលនោះ​ប្រកួត​ក្រុម​ឈុត​ធំ​)

-១៩ ឧសភា ១៩៧២ ៖ ថៃ ២-២ កម្ពុជា (Asian Cup)

-១៤ មិថុនា ១៩៧២ ៖ កម្ពុជា ២-០ ថៃ (​ពាន​មិត្តភាព Jakarta Anniversary Tournament នៅ​ឥណ្ឌូណេស៊ី​)

-២៤ កញ្ញា ១៩៧២ ៖ កម្ពុជា ០-០ ថៃ (​ពាន​មិត្តភាព Presidents Cup នៅ​កូរ៉េ​)

-០៧ សីហា ១៩៧៣ ៖ ថៃ ៤-១ កម្ពុជា (​ពាន​មិត្តភាព Merdeka នៅ​ម៉ាឡេស៊ី​)

-០៣ វិច្ឆិកា ១៩៧៤ ៖ កម្ពុជា ២-២ ថៃ (​ពាន​មិត្តភាព Vietnam Independence Cup នៅ​វៀតណាម​)

-១៨ ធ្នូ ១៩៧៤ ៖ ថៃ ១-០ កម្ពុជា (​ពាន​មិត្តភាព King’sCup នៅ​ថៃ​)

-១២ ធ្នូ ១៩៩៥ ៖ ថៃ ៩-០ កម្ពុជា (SEA Games – កាលនោះ​ប្រកួត​ក្រុម​ឈុត​ធំ​)

-១២ តុលា ១៩៩៧ ៖ ថៃ ៤-០ កម្ពុជា (SEA Games – កាលនោះ​ប្រកួត​ក្រុម​ឈុត​ធំ​)។

សូម​បញ្ជាក់​ជាថ្មី​ថា ការ​ប្រកួត​រវាង ថៃ ជាមួយ កម្ពុជា ធ្វើឡើង​នា​វេលា​ម៉ោង ៧ និង ៣០ នាទី​យប់ ថ្ងៃ​ទី ០២ ខែ​មករា ឆ្នាំ ២០២៣ នៅ​កីឡដ្ឋាន Thammasat Stadium ទីក្រុង​បាងកក ខណៈ​ការ​ប្រកួត នឹង​មាន​ការ​ផ្សាយ​បន្ត​ផ្ទាល់​តាមរយៈ​ស្ថានីយ​ទូរទស្សន៍ BTV News ផង​ដែរ៕

អត្ថបទ ៖ មន្នីរ័ត្ន