ហេតុអ្វីការប្រកួតពាន AFF Cup ២០២២ មិនមានអាជ្ញាកណ្ដាលកាត់សេចក្ដីមកពីប្រទេស​ក្នុងអាស៊ាន?

ការប្រកួតពានរង្វាន់ជើងឯកអាស៊ីអាគ្នេយ៍ ឬអាស៊ាន (AFF Mitsubishi Electric Cup 2022) បាននិងកំពុង​ដំណើរ​ការប្រកួតដល់វគ្គពាក់កណ្ដាលផ្ដាច់ព្រ័ត្រហើយ បន្ទាប់ពីបានចាប់ផ្ដើមប្រមាណ ៣សប្ដាហ៍រួចមក។

ប៉ុន្តែទន្ទឹមនឹងព្រឹត្តិការណ៍កំពុងដំណើរការបាន ២៤ប្រកួតទៅហើយនោះ គេសង្គេតឃើញថា អាជ្ញាកណ្ដាល​កាត់សេចក្ដីនៅលើទីលាន ឬអាចនិយាយដោយងាយយល់ថា ‘អាជ្ញាកណ្ដាលដែលផ្លុំកញ្ចែ’ នោះ គឺមិនមាន​សូម្បីតែម្នាក់មកពីប្រទេសក្នុងតំបន់អាស៊ានឡើយ។

អាជ្ញាកណ្ដាលកាត់សេចក្ដីនៅលើទីលាន សម្រាប់ AFF Mitsubishi Electric Cup​ ឆ្នាំ​២០២២ នេះ មានសរុប ១១នាក់ ក្នុងនោះមាន កូរ៉េខាងត្បូង ៤នាក់, ជប៉ុន ៣នាក់, អារ៉ាប៊ីសាអូឌីត ២នាក់, ឆាយនីសតៃប៊ិ ១នាក់, ហុងកុង ១នាក់, ហ៊្សកដានី ១នាក់​, អូម៉ង់ ១នាក់​, អារ៉ាប់រួម ១នាក់ និងអ៊ូសបេគីស្ថាន ១នាក់។

យោងទៅតាមការបញ្ជាក់ដោយអ្នកពាក់ព័ន្ធ មូលហេតុដែលមិនមានអាជ្ញាកណ្ដាលកាត់សេចក្ដី សូម្បីតែម្នាក់មក​ពីប្រទេស​ក្នុងតំបន់អាស៊ាន ក៏ព្រោះតែដោយសារដើម្បីរក្សាភាពសុក្រឹតយុត្តិធម៌ ជៀសវាងការសម្រេចចិត្ត​លម្អៀងដោយផ្អែកទៅលើការពាក់ព័ន្ធទៅនឹងប្រទេសរបស់ខ្លួនកំពុងប្រកួតក្នុងព្រឹត្តិការណ៍នេះផងដែរ។

ទោះបីជាយ៉ាងណា ជំនួយការអាជ្ញាកណ្ដាល ឬហៅថា អាជ្ញាកណ្ដាលខ្សែបន្ទាត់ ក៏មានអាជ្ញាកណ្ដាល ដែលមកពី​ប្រទេស​​ក្នុងតំបន់អាស៊ាន រួមទាំងមន្ត្រីអាជ្ញាកណ្ដាលទី៤ ផងដែរ (មន្ត្រីអាជ្ញាកណ្ដាលទី៤ គឺជាអាជ្ញាកណ្ដាល​ដែលលើកផ្លាកដោះដូរកីឡាករ ហើយនឹងមានតួនាទីសំខាន់ៗមួយចំនួនទៀត)។ លោក ជី សាមឌី ជាអាជ្ញាកណ្ដាល​កម្ពុជា តែម្នាក់គត់មានឈ្មោះក្នុងព្រឹត្តិការណ៍នេះ នាមជាមន្ត្រីអាជ្ញាកណ្ដាលទី៤។

គួរបញ្ជាក់ថា ក្នុងពានរង្វាន់នេះ កម្ពុជា បញ្ចប់ទៅដោយឈរនៅលេខ៣ ក្នុងពូល A ក្រោយប្រកួត ៤ដងរកបាន ៦ពិន្ទុ ប៉ុន្តែពុំគ្រប់គ្រាន់ដើម្បីឡើងទៅកាន់ការប្រកួតបន្តនៃវគ្គពាក់កណ្ដាលផ្ដាច់ព្រ័ត្រឡើយ។

គិតមកទល់ពេលនេះ ពានរង្វាន់ជើងឯកអាស៊ីអាគ្នេយ៍ ឬអាស៊ាន (AFF Mitsubishi Electric Cup 2022) បាននិងកំពុងដំណើរការប្រកួតដល់វគ្គពាក់កណ្ដាលផ្ដាច់ព្រ័ត្រ និងបញ្ចប់ជើងទី១ ហើយ ដោយឥណ្ឌូនេស៊ី បានស្មើជាមួយ វៀតណាម ០-០ ខណៈម៉ាឡេស៊ី បានឈ្នះ ថៃ ១-០។ ក្រុមទាំង ៤នឹងត្រូវជួបគ្នានៅជើងទី២ ម្ដងទៀត នាថ្ងៃទី៩ ទី១០ ខែមករា ឆ្នាំ២០២៣ ដើម្បីសម្រេចយកក្រុមឡើងវគ្គផ្ដាច់ព្រ័ត្រ៕ អត្ថបទ៖ មន្នីរ័ត្ន