ទីបំផុត PSG ទម្លាយមូលហេតុ មិនអនុញ្ញាតឲ្យ Messi កាន់ពាន World Cup ដើរដង្ហែក្នុងកីឡដ្ឋាន Parc des Princes

ក្លិប Paris Saint-Germain បានសម្រេចចិត្តមិនអនុញ្ញាតឲ្យម្ចាស់ជើងឯក World Cup កីឡាករ Lionel Messi ដើរដង្ហែពានរង្វាន់នៅឯកីឡដ្ឋាន Parc des Princes ទេ ដោយសារតែ បារម្ភថាអាចមានការរិះគន់ពីអ្នកគាំទ្រ។

PSG បានទទួលស្វាគមន៍ក្រុមភ្ញៀវ Angers ក្នុងក្របខ័ណ្ឌបារាំង Ligue 1 កាលពីរាត្រីថ្ងៃពុធ ដែលនោះជាការចូលលេងវិញលើកដំបូងរបស់ Messi ចាប់តាំងពីអាហ្សង់ទីនផ្តួលបារាំងក្នុងការប្រកួតវគ្គផ្តាច់ព្រ័ត្រ World Cup Qatar 2022 កាលពីថ្ងៃទី១៨ខែធ្នូឆ្នាំ២០២២។

ទោះបីជាយ៉ាងណាក៏ដោយ សារព័ត៌មានបារាំង Le Parisien បានរាយការណ៍ថា ក្លិបនឹងមិនអនុញ្ញាតឲ្យប្រធានក្រុមជម្រើសជាតិអាហ្សង់ទីន កាន់ពានដើរដង្ហែនៅលើវាលស្មៅក្នុងទឹកដីបារាំងនោះទេ ចំពេលមានភាពភ័យខ្លាចនៃការហ៊ោបង្អាប់ដល់ Messi។

លើសពីនេះ កាសែត Le Parisien បានសរសេរថា ក្លិបមានអារម្មណ៍ថា ការឈរអមសងខាងដោយកិត្តិយសដែលផ្តល់ឲ្យ Messi នៅពេលគាត់ត្រលប់មកហ្វឹកហាត់វិញ គឺជាការស្វាគមន៍គ្រប់គ្រាន់ហើយសម្រាប់អ្នកឈ្នះពានរង្វាន់ World Cup៕

ប្រែសម្រួល៖ Vann Vann

ប្រភព៖ Goal

ចុចអាន៖ បន្ទប់ដែល Messi ស្នាក់នៅអំឡុងព្រឹត្តការណ៍ World Cup 2022 នឹងប្រែក្លាយទៅជា សារមន្ទីរ