Messi និង Mbappe ត្រៀមប្រជែងគ្នា បំបែកកំណត់ត្រាធំមួយនៅ World Cup 2026

ខ្សែប្រយុទ្ធរបស់ក្រុមជម្រើសជាតិ អាហ្សង់ទីន កីឡាករ Lionel Messi និងខ្សែប្រយុទ្ធក្រុមជម្រើសជាតិ បារាំង Kylian Mbappe ត្រូវប្រជែងគ្នានៅ World Cup 2026 ដើម្បីបំបែកកំណត់ត្រាជាកីឡាករស៊ុតបញ្ចូលទីច្រើនបំផុតក្នុងប្រវត្តិសាស្ត្របាល់ទាត់ជើងឯកពិភពលោក។

ក្នុងកំណត់ត្រាកីឡាករស៊ុតបញ្ចូលទីច្រើនបំផុតគ្រប់ពេលវេលានៅ World Cup គឺអ្នកឈរចំណាត់ថ្នាក់លេខ ១ កំពុងកាន់កាប់ដោយវីរបុរស អាល្លឺម៉ង់ លោក Miroslav Klose ដែលរកបាន ១៦ គ្រាប់។ ចំណែកវិរបុរស ប្រេស៊ីល លោក Ronaldo Nazario ឈរលេខ ២ រកបាន ១៥ គ្រាប់, លោក Gerd Muller ឈរលេខ ៣ រកបាន ១៤ គ្រាប់។

អតីតកីឡាករ បារាំង លោក Just Fontaine ឈរលំដាប់លេខ ៤ រកបាន ១៣ គ្រាប់ ស្មើគ្នាជាមួយប្រធានក្រុម អាហ្សង់ទីន កីឡាករ Lionel Messi។ ដោយឡែក Kylian Mbappe ឈរនៅលំដាប់លេខ ៦ រកបាន ១២ គ្រាប់ស្មើគ្នាជាមួយវីរបុរស ប្រេស៊ីល លោក Pele។

ក្នុងចំណោមកីឡាករលំដាប់កំពូលទាំង ១០ គឺមានតែ Messi និង Mbappe ប៉ុណ្ណោះ ដែលជាកីឡាករនៅបន្តលេងក្នុងពេលបច្ចុប្បន្ន។ ដូច្នេះពួកគេទាំង ២ នាក់ នឹងក្លាយជាមុខព្រួញធំមួយ ដើម្បីវ៉ាលោក Klose ឡើងទៅឈរនៅចំណាត់ថ្នាក់លេខ ១ វិញ ដោយ Messi ត្រូវការ ៤ គ្រាប់ ខណៈ Mbappe ត្រូវការ ៥ គ្រាប់៕

អត្ថបទ៖ សេម កុសល